La disputa sus l’origina de Carlos Gardel es arribada a la fin. Una recèrca de mai de dètz ans a permés de localizar l’extrach de naissença del conegut cantaire e compositor de tangos. Lo resultat es qu’èra pas uruguaian ni argentin, mas occitan. Concretament, nasquèt a Tolosa l’11 de decembre de 1890, filh de maire celibatària, Berthe Gardes, que se vegèt forçada d’emigrar en Argentina quand l’enfant aviá dos ans e tres meses.

Los cercaires, que publican las donadas dins lo libre El padre de Gardel (Lo paire de Gardel), an explicat l’istòria al jornal argentin La Nación.
 
Los expèrts dison que Gardel s’inscriguèt al consolat uruguaian en 1920, quand se trobava en situacion irregulara perque aviá eludit de se presentar a l’ambaissada francesa a Buenos Aires quand començava la Primièra Guèrra Mondiala.

Alavetz s’inscriguèt coma uruguaian nascut a Tacuarembó tres ans abans de la siá vertadièra naissença. Cambièt tanben lo nom de familha original, Gardes, per Gardel, lo sieu nom artistic. Obtenguèt un certificat provisòri d’un an, que mantenguèt fins que s’enregistrèt coma argentin, nacionalitat que mantenguèt fins a la siá mòrt, en un accident d’avion, a Medellín (Colómbia), quand aviá 45 ans.