Las antenas localas de France 3 d’Aquitània, Lengadòc, Miègjorn-Pirenèus e Lemosin èran en cauma gèir, per s’opausar a la politica d’economias que las pertòca.

S’amassava tanben, gèir, lo comitat d’enterpresa de la cadena, a Bordèu, per evocar tèmas budgetaris, e la barradura anonciada de las antenas per las vacanças de Totsants e de Nadau. Tres setmanas shens edicions localas que diurén ajudar a redusir lo diute de la tresena cadena publica.
 
Peus grevistas, la maishanta gestion de la direccion se tròba a la hont d’aqueth diute, e non pas l’existéncia de las antenas localas. Segon lo comunicat de l’intersendicala, la politica d’austeritat trava la fabricacion d’emissions e empacha la cadena de realizar la soa mission de servici public de proximitat. Exprimissen tanben la volontat de tornar aviar las produccions regionalas. D’auta part, l’eventualitat d’un plan sociau es estada evocada peu president de France Televisions, lo Remy Pflimlin, l’11 de seteme passat. L’intersendicala bremba d’alhors que mantun salariats emplegats en contractes de durada determinats dempuish pausa, son estats sacats per aqueths torns.
 
Es estat hòrt seguit l’aperet a la cauma: segon chifras sendicalas, mei de la mitat deus emplegats d’Aquitània (100% en las redaccions de Pau o Baiona), e 65% deus jornalistas de F3 Lemosin se juntèren au movement. Mantunas edicions estoren pas asseguradas.




Pèir-Joan Masdiset