Fasètz la Lenga en Cabardés festeja los 20 ans d’existéncia de l’associacion amb un programa de qualitat per sa quinzenada d’animacions del 21 de febrièr al 4 de març. L’associacion s’apièja sus una carta per la promocion de l’occitan passada amb las cinc comunas partenàrias: Argon, Mossolens, Puègnautièr, Ventenac de Cabardés e Vilagalhenc.
 
Los 20 ans seràn especialament marcats per la jornada res-non-còsta del dissabte 25 de febrièr que se debanarà a Ventenac de Cabardés de vèspre: jòcs pels enfants (Ludule), mòstras de joguinas e d’objèctes de fusta, un balèti pels mainatges amb Sors Les Mains d’Tes Poches (17h), una conferéncia sus l’istòria occitana per Alèm Surre-Garcia (17h) e lo concèrt balèti amb Coriandre (21 h).
 
La dobertura de la manifestacion se farà tre lo dimars 21 de febrièr a Mossolens amb un recital del grop vocal Cossí que Siague (18h) e l’espectacle sus Pinocchio de Renat Sette (21 h). L’endeman (dimècres 22), l’Ostal de Cabardés d’Argon aculhirà un recital de l’un dels primadièrs de la cançon occitana modèrna: Eric Fraj.
 
Divendres 24, a Puègnautièr, la pèça Moi, Gaston Dominici, assassin par défaut tornarà amb un agach provençal sus aquel famós afar judiciari.
 
Dimenge 26, a Vilagalhenc, se poirà descobrir de matin lo biais de preparar una banha cauda e lo vèspre vos passejaretz long del Trapèl.
 
Lo dimars de ser (28 de febrièr, a Ventenac) serà vertadièrament un Dimars Gras amb la taulejada que virarà a l’entorn d’una gostosa mongetada animada per Tarabastar.
 
Dimècres 1r de març, una quina en occitan se debanarà a Argon. Divendres 3 de març, a Mossolens, Maria-Odila Dumeaux farà dintrar dins lo mond magic dels contes.
 
Novèla serada de tria per clavar amb la prestacion del grop polifonic niçard Còro de Berra, lo dissabte 4 de març à Vilagalhenc.
 
Tot lo programa çai jos e sul sit de Fasètz la lenga en Cabardés.
 
Per tota entresenha: +33(0)6 31 55 58 57. A aqueste numèro: inscripcion obligatòria per la taulejada del 28 de febrièr (15 èuros)
 
Al +33(0)4 68 25 19 78: inscripcion per l’obrador-cosina del dimenge de matin 26 de febrièr a Vilagalhenc.
 
Aquesta quinzenada d’animacions Fasètz la Lenga en Cabardés es organizada amb los sostens del conselh regional de la Region Occitània, del conselh departamental d’Aude, de l’Aglomeracion de Carcassona, de las Comunas d’Argon, Mossolens, Puègnautièr, Ventenac de Cabardés e Vilagalhenc.
 
Son partenaris de la manifestacion: la FAOL, l’Institut d’Estudis Occitans-Aude e Patrimònis, Vals de Cabardés. Localament, portan ajuda a la manifestacion: lo Fogal sòciocultural de Mossolens, lo Servici Cultural de Puègnautièr, lo Club Léo-Lagrange de Ventenac de Cabardés e l’AREP-Villegalhenc.
 
Las ràdios Ràdio-Lenga d’Òc-Narbona et RCF-Pays d’Aude consacran de cronicas e emissions especificas a la quinzenada.
 
 
Lo programa
 
 
dimars 21 de febrièr, Mossolens
   
dimècres 22 de febrièr, Argon, ostal de Cabardès
   
 
divendres 24 de febrièr, Puègnautièr
   
dissabte 25 de febrièr, Ventenac, la jornada dels 20 ans, animacions a res-non-còsta: Espaci René-Douce e Distillariá
   
 
dimenge 26 de febrièr, Vilagalhenc:
   
dimars 28 de febrièr, Ventenac de Cabardés, Espaci René-Douce
   
 
dimècres 1r de març, Argon, Ostal de Cabardés:
   
 
divendres 3 de març, Mossolens, sala E-Combes:
   
 
dissabte 4 de març, Vilagalhenc, sala polivalenta:
 



Alan Roch

 

---

Carta d’abonament pels espectacles pagants: 38 èuros