L’unitat de produccion numèro 2 de la centrala nucleara de Golfuèg (Sèrras d’Agenés) foguèt arrestada dissabte en fin de matinada en rason d’una pana “sus una tampa situada dins un bastiment auxiliar”, çò rapòrta La Dépêche. Electricitat de França (EDF) assegura qu’aquel “arrèst a pas cap de repercussion sus la seguretat de las installacions e sus l’environament”, mas que s’agiguèt de “la procedura de seguretat classic”.
 
Segon los responsables de la centrala, la reparacion se faguèt dins las qualques oras que seguiguèron la pana, e la represa èra prevista ièr o uèi al pus tard.
 
 
Totjorn d’accidents “sens gravetat”
 
La centrala agenesa a patit darrièrament divèrses incidents, totes qualificats coma “sens gravetat”.
 
Lo 19 d’octòbre passat, lo sit liberèt dins l’atmosfèra de regèts radioactius superiors al limit autorizat, quand fasiá mens d’un mes que lo reactor numèro 2 s’èra ja arrestat automaticament après una anomalia.
 
En decembre de 2012, la cort d’apèl de Tolosa aviá condemnat EDF a 4000 èuros d’emenda per una pèrda d’aiga radioactiva. Çò es una pèrda de triti que se faguèt lo 18 de genièr de 2010. Foguèt una pèrda mendre, qu’aguèt un impacte sus la santat feble, segon l’Autoritat de la Seguretat Nucleara (ASN).