Lo govèrn de Portugal càmbia d’idèa sul darrièr plan de reduccions budgetàrias qu’anoncièt e ditz ara qu’estudiarà d’alternativas a l’aumentacion de las quòtas a la Seguretat Sociala que pagan los trabalhadors. Aquela mesura, anonciada fa qualques setmanas pel primièr ministre portugués, lo conservador Pedro Passos Coelho, a descadenat la mai granda ondada de protèstas de l’an escolat en Portugal.
 
Divendres passat, de milièrs de personas assetgèron lo palais presidencial, ont s’acampava lo Conselh d’Estat, qu’amassa qualques assessors e compren lo president e lo primièr ministre. La reünion durèt mai de uèch oras, fins a la matinada de dissabte. Defòra, los manifestants acusavan lo govèrn de “panaire” e reclamavan que se retirèsse las mesuras d’austeritat. Fin finala, lo Conselh d’Estat a emés un comunicat oficial qu’anóncia qu’estudiarà d’autras alternativas en de negociacions dirèctas entre lo govèrn, los entrepreneires e los sindicats.