Actualitats
Delga e Puigdemont an signat un acòrdi de cooperacion occitanocatalan
L’acòrdi se materializarà l’estiu que ven dins los encastres de l’economia, de la lenga e la cultura dels dos territòris occitanocatalans
Tèxte legit
Economia, lengas e culturas
L’acòrdi se materializarà l’estiu que ven dins los domenis de l’economia, dont las connexions ferroviàrias e la linha de nauta velocitat, e tanben dins los de la lenga e la cultura.
De soslinhar que lo Principat de Catalonha conten un bocin d’Occitània en Aran mentre que dins la region nomenada Occitània-Pirenèus Mediterranèa cap un tròç de Catalonha.
Puigdemont rescontrèt lo MEDÈF a Tolosa
Puèi, ièr diluns, lo president de la Generalitat tenguèt una reünion a Tolosa amb lo conselh del MEDÈF de la region, lo patronat que representa aperaquí 750 000 societats dont la majoritat son de PME, dels sectors de l’indústria, del comèrci e dels servicis.
Durant la reünion, Puigdemont e los patrons occitans e catalans analisèron la situacion politica e economica del Principat de Catalonha e de sas relacions economicas e entrepresarialas amb l’estat francés.
Signature avec le Président #Puigdemont de la lettre d'intention de partenariat entre nos deux institutions #Occitanie et #Catalognepic.twitter.com/214BAOp7Wo
— Carole Delga (@CaroleDelga) 19 de febrer de 2017
Gràcies per la vostra acollida i amistat, i per la voluntat de continuar treballant plegats pel futur d'occitans i catalans. https://t.co/EaaPwIfXMQ
— Carles Puigdemont (@KRLS) 19 de febrer de 2017
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#8 es la bòna endrechiera de segur
Una petita amassa del que pot ser lo deman.
Fai besonh un embrion per veire nàisser lo nenet. Diguem que l'embrion es un embrionet e que li disèm "Occitanie" : per un començament, aquò's pas tant marrit.
Ara, nos avisam que i aurà benlèu un besson : l'embrionàs "Catalunya".
E se l'alhòli vòu ben montar coma sembla de o faire, aqueste alhòli crearà automaticament un revolum que s'atrairà au mens los espandis periferics de las regions vesinas : una mena d'emicicle que partiriá de Marselha, prendriá lo Comtat Venaicin enjusca Ventor, lo sud de Droma e d'Ardecha, lo sud de Velai enjusca au Puèi, puèi lo sud de Cantau (per quant als "novèls aquitans", me laie pas per eles : començan puslèu bien).
Pense que la dòna Delga, amai fague partida d'un partit politic tenchat parisenc e centralista, cèrca de refortir l'autonomia regionala e d'entegrar la granda nòva region dinc un espandi culturalament e economicament pus coerent. Mès es oblijada de i anar, ço me pense, sens tròp espolsar las sensibilitats que se tròvan au torn d'ela e encara mai au govèrn.
Pense qu'es pro fina e que vei luènh : deu per aquò agir d'un biais estrategic se vòu metre de son costat lo mai d'actors politics, economics e culturaus.
Una causa que francament me fai gaug : son accent d'aquela femna. Tota conselhièira regionala qu'es, a bien l'accent dau País e l'assumís completament. Aquí un modèle vengut d'un pauc naut (pas tant naut coma o son los òlis parisencs, caucanha !), un modèle que descomplexarà benlèu los occitans refolats amai los novèls venguts que çai veiràn un accent capable de dire de causas seriosas, un accent fierament portat per una personalitat emportanta, una femna amai.
L'exemple es sovent vengut d'en naut quand "faliá" pèrdre l'accent, rapelatz-vos nòstra Istòria. E quand la lenga deviá pas èstre trasmesa als enfants, la prumièira persona que fasiá l'esfòrç d'estofar son "patoés", aquò z-èra la femna.
Demorem fisançós, sèm a virar doçamenet una pagina de l'Istòria, amai se aquò's pas totjorn de bòn creire.
Que lo patronat lengadocian pren consciença de son occitanitat e de la necessitat de se solidarisar es pas de manca. Mas, tota accion d'una region occitana devria aver en testa un project d'integrar son accion dins un ensemble qu'amassaria totas las régions occitanas mesme si quò es mas au niveu de las idéias per lo moment.
La Region nomada Occitania deu pas demorat egoista e replejada sus ela-mema. La cultura e l'economia franca es una cultura de plana, a totjorn contornat lo Massif_Centrau, s'es espandida a partir de la plana de Peiteus a Bordeu e per lo corridor dau Ròse. Si Tolosa prefera passat per Bordeu o Narbona per anar a Paris de segur lo Massif Centrau es laissat de costa. Si las Pireneus son pas una barriera culturala, alaidonc lo Massif Centrau z'es. Lo liam entre lo Massif-Centrau e las régions pus au sud son los afluents de Garona. Benleu una pista per pensar l'economia autrament.
L'Europe tal que s'es facha tresquen-z-a aura es acabada; degun pus n'en vòl. Nòstre mestre es pus l'Europe ni Franca. Nòstre mestre es pus lo fanatisme religios o lo fanatisme ideologic laic que l'argent que los sostenia a virat de bòrd. Nòstre mestre es nòstre. Aqui devam chausir entre l'Occitania independenta o autonoma, entre una politica de guerras de rivalitatse e una politica de solidaritat, d'entraida, de coperacion. La mar miejaterrana deu pus esser una mar de sanh mas de relacion entre sos riverans. Quò copera benleu en dos l'Europe dau nòrd (emben Russia) e l'Euròpe dau sud (emben occitania). L'òm sent aquela evolucion avant mesme de la concretisar.
#1 Mercés plan!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari