La plataforma Independéncia per Escòcia organizèt dissabte passat una manifestacion a Edimborg per far una demostracion de fòrça de l’independentisme, en supòrt de la campanha “YEScampaign”. La protèsta amassèt mai de dètz mila manifestants amb l’agach mes sul referendum de 2014. Los organizaires vòlon ensajar de dinamizar la mobilizacion per carrièras dins un país qu’a pas costuma de far de manifestacions d’aquel tipe. De fach, es la primièra manifestacion independentista de l’istòria d’Escòcia.
 
Ça que la, los grops socials e lo quite Partit Nacional Escocés (SNP) creson qu’es de besonh de far d’accions per carrièras, dirèctas e popularas, e per aquò participèron.
 
Lo primièr ministre escocés, Alex Salmond, parlèt als manifestants a la fin de la marcha e reafirmèt que “Las decisions sus Escòcia, an de las prene los escoceses dins una Escòcia independenta”.
 
A la marcha i participèt tanben la plataforma Partenariat Europèu per l’Independéncia (European Partnership for Independence, EPI), qu’amassa d’independentistas escoceses, flamencs, bascos e catalans.