Los 600 000 guits d’elevatge encara vius dins las Lanas seràn abatuts per ensajar d’eradicar l’epidemia de gripa aviària e se desfar del virus H5N8, çò anoncièt ièr dimars de matin lo ministre de l’agricultura francés, Stéphane Le Foll, a l’antena de France Bleu Gascogne.
 
 “Avèm ja abatut fòrça guits sus la partida èst del departament, sabèm que rèsta una zòna sus la quala agirem per abatre l’ensemble dels guits per ensajar d’estabilizar aquela zòna”, çò diguèt lo ministre tanlèu respondre afirmativament a la question se caliá tuar los 600 000 guits del departament.
 

 
 
L’opcion de tuar totes los guits la suggeriguèt fa qualques jorns lo president del Conselh departamental, Henri Emanuelli. “Al punt que ne sèm arribats, o valriá melhor abatre tot, que sàpiam a quina data far tornar desmarrar la produccion” çò diguèt Emanuelli a un elegit d’oposicion que planhiá la manca de visibilitat dels abatatges preventius, çò publicava La Setmana lo 14 de febrièr passat.
 
Gasconha sembla fòrça pertocada per aquela epidémia aviària, mai que mai en Lanas e Labrit, Armanhac e Bearn, ont son ja 1,35 milions de guits tuats dins 227 bòrias.
 
 
Qu’es aquò lo virus H5N8
 
Lo virus H5N8 o “Influenzavirus A sos-tipe H5N8” se detectèt pel primièr còp en Irlanda dins los ans 1980. Es un dels nombroses sos-tipes de virus gripals de tipe Influenzavirus A de la gripa A. Es classat dins las nomenadas “gripas aviàrias”, un grop de virus qu’infecta unicament d’espècias d’ausels sián salvatges o domestics, dont las volalhas. Qualques unes d’aqueles virus pòdon —mas pas sovent— infectar d’ausèls en gàbia e tanben de mamifèrs. E mai s’es un virus nautament patogèn per las volalhas, se desconeis cap de cas de contaminacion umana.
 
Son jòc de mutacions lo poiriá rendre infecciós per l’èsser uman, mas aquel risc a l’ora d’ara se pòt pas evaluar. Es per aquela rason qu’es objècte d’una atencion particulara de la part dels rets de susvelhança veterinària, e dins l’estat francés es classat dins la categoria “Perilhs santiaris”.