Un milièr de personas manifestèron dissabte 15 de setembre a Louaneg (Bretanha), en sosten a l’escòla en lenga bretona Diwan. Los parents mostrèron la lor satisfaccion, mai que mai pr’amor qu’après la protèsta, l’avenir de l’escòla Diwan de Louaneg es assegurat.

Segon lo jornal numeric breton 7Seizh, la manifestacion se debanèt dins un ambient festiu e convivial, luènh de las estimacions de la gendarmariá e de la comuna que prevesián mens de 150 manifestants amb d’incidents. Las autoritats avián alertat los comerçants suls risques d’afrontaments e degradacions e qualques comerçants cediguèron a la paur e barrèron los lors comèrcis. Per contra, la sala e la terrassa del cafè del vilatge èra dobèrta per l’ocasion.
 
Los elegits locals participèron pas a la manifestacion; ça que la, Léna Louarn, vicepresidenta de la region, en carga de las lengas de Bretanha, i anèt per anonciar una sortida aürosa. Dins una reünion a la prefectura, lo divendres 14 de ser, la region s’engatjava a crompar l’ostal Saint-Yves, local ja senhalat per l’associacion Diwan. La region i fariá la restauracion necessària. L’associacion Diwan poirà, doncas, venir logatària dins de condicions decentas.
 
Diwan (“grelh” en breton) es un grop d’escòlas associativas, laïcas, gratuitas e dobèrtas en totes, creadas en 1977, que fan l’ensenhament amb un sistèma d’immersion lingüistica en breton.
 
Las escòlas Diwan forman, amb Calandreta, la Bressola, Seaska e las escòlas ABCM-Zweisprachigkeit, una confederacion d’escòlas bilingüas dins l’estat francés.