Danemarc nomenarà un “ambaissador digital” per manténer de relacions diplomaticas amb las grandas entrepresas, coma Google, Apple Netflix e Facebook. O expliquèt lo ministre dels afars estrangièrs danés, Anders Samuelsen, dins un article al jornal Politiken.
 
Segon Samuelsen, “aquelas societats son una sòrta de nòvas nacions amb un grand poder, que tòca los interèsses dels ciutadans daneses”. Lo prètzfach del nòu ambaissador serà de s'assegurar que las entrepresas prengan en compte l’opinion de l’estat danés dins totas las questions d’interès comun. Demest los tèmas que lo ministre a soslinhats, i a l'intelligéncia artificiala, las nòvas falsas, las veituras sens menaire, las grandas basas de donadas e los objèctes connectats.
 
En mai d’aquò, aquel ambaissador se cargarà de las negociacions per los grands projèctes digitals en Danemarc, coma los centres de donadas qu'Apple e Facebook son a bastir a Viborg e Odense.
 
Que i aja d'ambaissadors especials es pas un fenomèn estranh, sustot dins de païses coma Danemarc qu'an nomenat de diplomatas per de prètzfaches especials dempuèi longtemps.