La polícia de Malàisia a identificat lo material amb lo qual tuèron la setmana passada Kim Jong Nam, lo frairastre del cap nòrd-corean Kim Jong Un. Dins una conferéncia de premsa, l’inspector general de la polícia, Khalid Abu Bakar, a declarat que lo Centre d’Analisi de las Armas Quimicas a fach un estudi preliminar de l’element quimic emplegat pel murtre, amb de mòstras dels uèlhs e de la cara de la victima.
 
Lo frairastre del dirigent nòrd-corean aviá quaranta sièis ans e foguèt assassinat lo 13 de febrièr a l’aeropòrt de Kuala Lumpur, la capitala de Malàisia. Segon las autoritats, foguèt atacat amb un pulverizador quimic e moriguèt après, quand èra menat a l’espital.
 
Pel moment an detengut doas femnas que la polícia crei responsablas dirèctas de l’atac, e lo companh d’una d’aquelas femnas es un ciutadan del passapòrt nòrd-corean.
 
 
Una substància considerada coma una arma de destruccion massissa
 
“La substància quimica identificada es un agent nerviós nomenat VX”, çò diguèt Abu Bakar. Es extrèmament toxica, d’efièch fòrça rapid, considerada coma una arma de destruccion massissa per la resolucion 687 de las Nacions Unidas. La convencion sus las armas quimicas n'enebís la produccion e l’estocatge.
 
Segon los centres de contraròtle de las malautiás del govèrn estatsunidenc, los simptòmas de l’empoisonament per VX apareisson après qualques segondas se l’element es a l’estat gasós; s’es jos sa forma liquida, pòt demorar entre qualques minutas e dètz e uèch oras.
 
Dels elements nervioses coneguts, lo VX es lo mai potent, quitament mai que pas lo gas sarin. Es mai tòxic s’intra en contacte a travèrs de la pèl e, mai encara, s'es per inalacion.