La jornalista curda Shifa Gardi moriguèt dissabte passat a Mossol mentre que raportava l’ofensiva de l’armada iraquiana contra l’autoproclamat Estat Islamic, segon Rûdaw Media Network, l’agéncia ont trabalhava. Gardi moriguèt una ora après sa darrièra connexion en dirècte per la television, a causa d’una bomba.
 
Gardi presentava l’emission Rûdawy Musol (o Focus Mosul), dins l’encastre dels programas informatius de Rûdaw, per raportar l’operacion militara que comencèt en octòbre de 2016 contra l’Estat Islamic dins la vila, qu'es lo grand bastion dels jihadistas dins l’estat iraquian.
 
“Rûdaw a perdut uèi una de sas raportairas mai remirablas. Lo jornalisme es un mitan dominat pels òmes, mas Shifa Gardi rompèt aquelas percepcions e estereotips”, çò soslinhèt Rûdaw, qu’es un dels mèdias mai importants sul terren dins aquel conflicte. A mai, l’agéncia apond: “Volèm aquí rendre omenatge a son valent sens del jornalisme. En nom de Rûdaw Media Network, volèm del biais mai sincèr plànher lo dòl a la familha e als amics e a nòstra còla despartida per tot lo Mond”. Lo cameraman Iunis Mustafa, qu'acompanhava Gardi al moment de l’explosion, es ferit.
 

#Rudaw reporter and anchor Shifa Gardi killed in bomb attack in #Mosulhttps://t.co/2Ou13RZhjW via @RudawEnglish

— Rudaw English (@RudawEnglish) 25 de febrer de 2017

 

#BREAKING: Prominent Rudaw war reporter and journalist Shifa Gardi has been killed in #Mosul as she covered clashes. pic.twitter.com/GZXrgavKS8

— Rudaw English (@RudawEnglish) 25 de febrer de 2017

 
Tanben lo govèrn curd a exprimit sa tristesa.
 

Extremely Disheartening to Hear of #ShifaGardi's Death, a Brave Journalist & Role Model to Young Women.My Condolences to Her Family & #Rudawpic.twitter.com/2Ion7tNEYY

— Falah Mustafa (@FalahMustafa) 25 de febrer de 2017

 
Sos collègas, coma lo correspondent de la BBC Quentin Sommerville, an manifestat lor esmoguda.
 

Often when we arrive somewhere Rudaw is already there. Intrepid & determined. Our condolences to friends at @Rudawkurdish@RudawEnglishhttps://t.co/3867BGqk7Q

— Quentin Sommerville (@sommervillebbc) 25 de febrer de 2017

 
Aquesta dimenjada an crescut los combats a Mossol, en seguida de l’avançada de las tropas iraquianas a l’oèst de la vila per ensajar de ganhar de terren sus l’Estat Islamic. La nòva batalha se prevei encara mai sagnosa que la que comencèt en octòbre. L’ÒNU calcula qu’aperaquí 400 000 personas deuràn partir d’aquela zòna de la vila, e las ONG avertisson que vivon sens combustible e sens manjar.