A la candidata ultradrechista a la presidéncia francesa, Marine Le Pen, li donèron pas gaire la benvenguda aquesta dimenjada a Nantas (Bretanha). Entre 2000 e 3000 manifestants, segon la polícia e los sindicats respectivament, desfilèron dissabte per protestar contra la venguda de Le Pen, que faguèt una reünion publica ièr dimenge. Fòrtament enquadrats per la polícia, los manifestants brandissián de bandeiròlas que se i podiá legir “FN impostura sociala” o “Lo faissisme passarà pas”, çò rapòrta Le Huffington Post, que mençona l’AFP. (Fòtos de la manifestacion)
 
Puèi, la protèsta degenerèt en afrontaments amb la polícia, que venguèron de mai en mai violents. Lo jornal breton 7Seizh o raportava en dirècte.
 
Los rambalhs provoquèron de veirinas trencadas, de tags sus las parets de monuments, e de mobilièr urban damatjat.
 
Mai de 500 policièrs antisusmauta e 200 policièrs urbans foguèron mobilizats per reprimir los manifestants. Segon lo ministèri de l’Interior, i auriá “11 policièrs e gendarmas ferits e contusionats”. Aquelas fonts tanben mençonavan l’interpelacion de uèch personas, lo dimenge que precedissiá lo començament de la reünion publica, una chifra que poiriá aumentar. Avèm pas trobat lo nombre total de manifestants nafrats.
 
Suls rets socials se critica l’accion de la polícia, qu’auriá balançat a la nautor de las caras de grenadas de desencerclament sus la molonada que fugissiá.
 

Quand la Police balance à hauteur des visages des grenades de désencerclement sur la foule en fuite! #NantesContreLeFNpic.twitter.com/J3615Qj5oe

— Nikos Poulos (@Nikos_Los) 25 de febrer de 2017

 
 
Bas prestigi de la polícia
 
Aqueles rambalhs se produson dins un moment que lo prestigi de la polícia francesa es de mai en mai mes en question. D’après los comentaris sus Twitter de la manifestacion de Nantas, l’afar de Théo es fòrça present. Òm remembra, e met en question l’autoritat morala de las fòrças de l’òrdre, après que lo 2 de febrièr passat detenguèron un jove negre de 22 ans dins la banlèga de París que, segon son relat, los agents lo batèron mentre qu’un d’eles li metiá una matraca extensibla dins l’anus. Lo jove deguèt èsser operat a causa d’esquiçaduras.
 
Mas l’irritacion sociala arribèt quand l’Inspeccion Generala de la Polícia Nacionala [vòl dire estatala] afirmèt que se tractava d’un viòl “non intencional”.