Dins la darrièra reünion del Conselh de Politica Lingüistica de l’Occitan Aranés se presentèt lo budget per l’an 2017 e lo Govèrn d’Aran demandèt al govèrn de la Generalitat de melhorar lo finançament de la promocion de la lenga pròpria d’Aran. Dins aquel sens, la Generalitat de Catalonha presentèt la dobertura d’una nòva categoria de subvencions amb una valor totala de 40 000 èuros que seràn destinats a las associacions consagradas a l’estudi e a la promocion de l’occitan.
 
Dins aquela reünion, se presentèt las accions fachas per la normalizacion lingüistica en Aran. En 2016, lo Conselh General d’Aran destinèt aperaquí 113 000 èuros per d’accions en favor de la lenga, dont la traduccion de mai de 500 tèxtes, de teatre a l’escòla e divèrses prèmis literaris e culturals.
 
Durant aquela reünion s’expausèt tanben los trabalhs de l’Institut d’Estudis Araneses-Acadèmia Aranesa de la Lenga Occitana.
 
Lo Conselh de Politica Lingüistica de l’Occitan Aranés, format del govèrn de la Generalitat de Catalonha e del Conselh General d’Aran, ten uèch membres e sos presidents son lo conselhièr catalan de la cultura e lo sindic d’Aran. Sa tòca es de coordenar las mesuras de normalizacion lingüistica de l’occitan, partejadas entre lo govèrn de la Generalitat e lo del Conselh General d’Aran.