La candidata del Front Nacional a l’eleccion presidenciala es estada convocada pels jutges d’instruccion, en vista d’una possibla mesa en examen, dins l’enquèsta sus la sospiècha d’emplecs fictius dels assistents del partit ultrafrancista al Parlament Europèu. Mas ela a fach saber que s’i rendrà pas, e a mandat un corrièr als jutges en disent que respondrà pas aquela convocacion abans la fin de la campanha.
 
Dins aquel afar, Le Pen es a un pas de la mesa en examen. Segon l’AFP, los jutges an convocat la candidata ultrafrancista en vista d’una inculpacion formala, qualques jorns après la de sa cap de gabinet, Catherine Griset. Una convocacion que Le Pen refusèt, com o aviá tanben fach lo 22 de febrièr a l’esgard de la polícia judiciària. Alavetz Marine Le Pen aviá anonciat tanben qu’acceptariá pas cap de convocacion d’aquela sòrta fins a las eleccions legislativas de junh, en afirmant que l’afar dels assistents es un montatge de sos adversaris politics per far mal a sa campanha presidenciala. Dins la novèla missiva, a mai, la candidata estima que las condicions de “legalitat”, de “serenitat” e de “fisança” son pas reünidas per que siá entenduda.
 
 
Los jutges menaçats
 
Lo 28 de febrièr passat, Marine Le Pen se mostrèt neta e clara: se ganha l’eleccion presidenciala, aqueles qu’òbran a far emergir los afars deuràn rendre de comptes. “Vòli dire als foncionaris, a qui un personal politic aculat demanda d’utilizar los poders de l’estat per susvelhar los opausants, d’organizar a lor encontre de persecucions, de còps tòrts, o de cabalas d’estat, de s’engardar de participar a de derivas aitalas. Dins qualques setmanas, aquel poder politic serà estat escobat per l’eleccion. Mas sos foncionaris, eles, deuràn assumir lo pes d’aqueles metòdes illegals. Meton en jòc lor pròpria responsabilitat. L’estat que volem serà patriòta”, çò diguèt.


Lo Parlament Europèu lèva l’immunitat de Marine Le Pen

Los deputats europèus decidiguèron dijòus passat de levar l’immunitat parlamentària de la cap ultrafrancista e candidata a l’Elisi, Marine Le Pen, a la demanda de las autoritats francesas, que la meton tanben en examen per aver propagat suls rets socials d’imatges de las execucions de l’autoproclamat Estat Islamic.
 
Los eurodeputats votèron a man alçada e sostenguèron la retirada de l’immunitat a Le Pen per una “larga majoritat”, çò constatèt lo vicepresident de l’èurocambra Dimitrios Papadimoulis, que susvelhava la sesilha del vòte.
 
L’afar ven de l’an 2015, quand l’èurodeputada ultrafrancista publiquèt sus son compte de Twitter tres fotografias que mostravan tres personas mòrtas, tuadas per l’organizacion terrorista —una decapitada, una autra cremada viva, e una autra esclafada per un tanc—, acompanhadas del messatge “Daish es aquò”.
 
Lo ministre de l’Interior d’alavetz, qu’ara es lo primièr ministre de França, Bernard Cazeneuve, considerèt qu’aquelas publicacions sus Twitter èran una “viletat” e de “propaganda” del grop terrorista, e portèt l’afar a las mans de la polícia. Lo ministèri public de Nanterre, a la periferia de París, a començat l’enquèsta per difusion d’imatges violents e a sollicitat que se suspenda son immunitat parlamentària.
 
La decision de li retirar la proteccion parlamentària tòca solament l’afar de las fiuladas sus Twitter e non pas l’autra enquèsta qu’a dobèrta contra ela lo burèu antifrauda de l’UE que l’acusa d’“aver versat indegudament” d’argent de l’eurocambra destinat a pagar d’assistents parlamentaris.
 
 
Una seguida de conflictes amb lo Parlament Europèu
 
Es pas lo primièr conflicte que lo partit de l’ultradrecha francista ten amb l’eurocambra. En decembre de 2015 Le Pen se deguèt explicar davant lo Parlament Europèu per fraudariá al vòte. L’afar se passèt en octòbre de 2015 dins l’encastre d’una sesilha longassa que los eurodeputats i examinavan d’emendaments un a un. Après doas oras, Marine Le Pen s’alassèt e quitèt l’emicicle, mas estranhament se contunhava d’enregistrar de vòtes en son nom.
 
Tanben a la prima de 2015, lo president de l’èurocambra d’alara, Martin Schulz, demandèt una enquèsta per l’engatjament de 20 assistents parlamentaris, qu’en realitat trabalhavan per las estructuras del Front Nacional a París. E en 2013, l’Eurocambra levèt a Marine Le Pen son immunitat parlamentària perque lo ministèri public de Lion (Arpitània) aviá dobèrt una enquèsta contra ela per incitacion a l’òdi racial.