Jornalet publicarà cada dimars, fins a la fin del Torneg de las Sièis Nacions de 2017, la cronica de Gèli Grande qu’auretz pogut escotar cada diluns sus Ràdio Lenga d’Òc.

Aquesta dimenjada 4 e 5 de març de 2017 lo Torneg de las sièis nacions de rugbi de quinze fasiá sa segonda pauseta.
 
Cada an, per establir lo calendièr del Tornèg, i a doas escòlas. La primièra que voldriá que tot se debanèsse en cinc dimenjadas, cò que desliurariá de datas per d’autras competicions e la segonda que pensa que la competicion internacionala aquesta es plan dura e que cal que los jogaires de rugbi se pausen un pauc. Mercés plan de pensar a eles.
 
Respondrai que lo nòstre Tòp Catòrze es de plan naut nivèl e una seguida de cinc jornadas de tira de campionat es pas quicòm d’escàs en debuta de sason.
 
Coma o sabon los que s’interèssan al Torneg, en 2000 passèt de cinc a sièis nacions amb l’entrada d’Itàlia. Vertat es que las performanças d’aqueste país son pas meravilhosas. Sonque 12 rescontres gasanhats, una egalitat e 72 desfachas sens oblidar 6 culhièrs de bòsc en 2001, 2002, 2005, 2009, 2014 e 2016.
 
N’i a que plaidejan que lo rugbi italian es plan tròp flac e que pels autres cinc paises, rescontrar Itàlia es sinonim de victòria quasi assegurada.
 
Dison tanben que cal èsser seriós e remplaçar Itàlia per Georgia qu’es mai nauta qu’eles al classament rugbistic mondial.
 
D’unes dison encara que per responsabilizar Itàlia caldriá establir una espròva de barratge contra aquesta meteissa Georgia que dempuèi qualques annadas senhoreja plan planet lo campionat europèu de las nacions escaisnommat Torneg B.
 
Totun una question me tafura: se lo barratge prepausat concernissiá Anglatèrra, Escòcia, Irlanda, Galas o los occitans de França, cresètz que lo mond i pensarián? Me pensi que la responsa es dins la quita question. 
 
Me permetrai de far una rampelada istorica. En 1910, las autras nacions admetèron los occitans de França dins lo Torneg que passèt de 4 a 5 nacions. Entre 1910 e 1931, lo culhièr de bòsc l’aguèrem en 1910, 1912, 1913, 1914, 1925, 1926 e 1929. Sens la Primièra Guèrra Mondiala e la crisi dels ans 1930, plan segur que la nòstra colleccion d’aqueste aplech simbolic seriá estada encara mai importanta.
 
S’entre 1931 e 1947, foguèrem fòrabandits del Torneg, èra subretot per encausa de la violéncia del nòstre campionat e del professionalisme qu’i nasejava, çò qu’èra inadmissible a l’epòca.
 
Foguèrem pas fotuts defòra perque perdiam quasiment totes los rescontres.      
 
 
 
 
Gèli Grande