Las darrièras informacions per quant de l’ofensiva d’iraquians e curds sus Mossol, una de la vilas pus grandas d’Iraq, parlan de la captura d’un segond pont sul flume Tigre. S’agiriá del segond pont, suls cinc que i a dins la vila, e los soldats de l’autoproclamat Estat Islamic (EI) l’aurián perdut fa mens de 7 oras.
 
Aquel pont èra una de las tòcas de las fòrças iraquianas e curdas quand entamenèron una ofensiva contra la vila —a las mans encara dels radicals jihadistas— e lor conquista definitiva seriá, doncas, arribada en mens de 24 oras après son començament. La part pus orientala d’aquel pont seriá estada conquistada per l’armada irquiana a la debuta de 2017 après de durs combats.
 
 
Cinc ponts bombardats pendent qualques setmanas
 
E mai s’aqueles cinc ponts son estats bombardats dempuèi qualques setmanas, la captura del pont en question, conegut coma Al Jamhuriya, significariá que l’armada iraquiana a ja a un pè de l’autre costat de Tigre dins Mossol. A mai, l’ataca auriá limitat lo poder de l’EI de contratacar sus aquel pont del costat occidental de la vila estant. Un còp conquistada, Mossol seriá la darrièra granda vila que l’EI ten en Iraq.
 
La setmana passada, un oficièr de l’armada irquiana confirmèt que l’armada governamentala d’aquel país aviá patit los combats pus fòrts après lo començament de l’ofensiva sul ponent de Mossol fa doas setmanas. Dins aquela part de la vila  i a  la Granda Mosqueta Al Nuri ont l’autoproclamat califa Abu Bakr Al Baghdadi proclamèt la creacion del califat de l’Estat Islamic pendent l’estiu de 2014.
 
En mai d’aquò, l’Organizacion Internacionala per las Migracions a confirmat que mai de 200 000 personas an fugit Mossol e que las agéncias umanitàrias an fòrça problèmas per ajudar tant de personas que quitan la vila e la guèrra.
 
 
 
 
Christian Andreu