Una avalanca frapèt ièr dimenge, a 4 oras del matin, un acamp d’alpinistas en Imalaia, en fasent almens nòu mòrts e quatre desapareguts, segon la polícia nepalesa. Lo grop se compausava d’un vintenat de personas que demest elas i aviá de ciutadans dels Estats francés, alemand e italian e l’activista catalan Martí Gasull, fondador de la Plataforma per la Lenga, qu’a ja publicat una nòta de condolença.

L’avalanca se produsiguèt sul Manaslu (8163 mètres), l’ochen cim mai naut del mond, dins lo nòrd de Nepal. “Segon las nòstras informacions recebudas dempuèi lo camp de basa, aquela avalanca s’amodèt cap a 7400 mètres e emportèt una part del camp 3 a 6800 mètres”, çò diguèt als mèdias lo Sindicat Nacional de Guidas de Nauta Montanha, amb sedença en Arpitània.
 
“Menèt un grand bruch. Aguèri paur”, çò declarèt un subrevivent alemand dins l’espital de Katmandó. “Aguèri l’astre, foguèri pas emportat e foguèri pas enterrat jos la nèu”. Fasiá partida d’un grop de tretze alpinistas alemands e austrians.
 
Un autre subrevivent italian expliquèt que totes los alpinistas dormissián dins de tendas amb los lors shèrpas quand foguèron suspreses pel laveg. “Es probable que jos l’avalanca, i aja d’autras victimas”, çò estima.
 
L’inspector de polícia Basant Mishra expliquèt que los còrses sens vida apareguèron a qualques 7000 mètres al mont Manaslu, aperaquí a 100 quilomètres al nòrd e Katmandó. S’agís d’un endrech complicat per las còlas de salvament. Al delà, las nívols e las nèblas an empedit los prètzfaches de salvament.