Segon lo Dalai Lama actual, es probable que siá lo darrièr cap esperital de la comunautat bodista tibetana, a causa de las temptativas efectuadas per las autoritats chinesas per designar son successor e consolidar lo contraròtle del Tibet, qu’es lo brèç d’aquela religion. “Es fòrça possible”, çò diguèt lo cap politicoesperital dins una entrevista facha per l’umorista estatsunidenc John Oliver a Dharamsala (Índia), ont se situa la basa del govèrn tibetan en exili. “Me sentiriái fòrça aürós s’èri lo darrièr Dalai Lama”, çò apondèt.
 
Segon la doctrina bodista, l’arma del Dalai Lama se reencarna, après morir, dins lo còrs d’un enfant. Mas l’actual a suggerit qualques còps qu’el poiriá èsser lo darrièr, çò que las autoritats de China interprètan coma una traïson, e vòlon aver drech de decidir qual serà lo seguent.
 
Interrogat sus aquela menaça chinesa, el a considerat que seriá una estupiditat. “Lo nòstre cervèl a normalament la capacitat de produire de sens comun, mas sembla que los dirigents chineses manquen d’aquela part del cervèl”, çò respondèt.
 
Lo Dalai Lama fugiguèt en Índia en 1959, acusat per las autoritats de la China d’incitar a la violéncia dins la region autonòma de Tibet, çò que lo lidèr religiós nega. Despuèi alara, l’enemistat entre los dos camps a pas cessat de créisser.