Banksy, l’artista de carrièra engatjat e fòrça conegut, participa al projècte d’una ostalariá que s’inaugura uèi a Betelèm (Palestina). En aquesta ocasion, l’òbra del graffitaire es lo decòr de l’establiment, que tot aqueste representa una denóncia del mur que l’alcèt l’estat d’Israèl en 2003. Se nomena The Walled Off Hotel e dobrís sas pòrtas uèi, 11 de març. Òm se pòt lotjar dins de cambras totas plenas d’art engatjat per denonciar lo conflicte en Palestina, a partir de 30 dolars per nuèch.
 
Segon lo director de l’establiment, s’agís de “l’ostalariá amb las piègers vistas del Mond”, car los òstes poiràn solament veire de lors fenèstras estant la barralha que devesís Cisjordania, una paret de betum d’uèch mètres de nautor. Las cambras tenon de graffitis faches pel quite Banksy e tanben d’autres artistas coma Dominique Petrin e Sami Musa.
 
L’idèa del projècte es d’atraire de toristas per revitalizar l’economia locala dins una vila de 32 000 abitants envoutada per 18 installacions de colons israelians, practicament isolada de la rèsta de Cisjordania.
 
En mai d’aquò, lo Walled Off cèrca de venir un centre d’exposicions per que los artistas locals, que patisson de restriccions per viatjar a l’exterior, pòscan far conéisser lors òbras.
 
Banksy es un artista tant conegut coma desconegut. Son òbra engatjada, especialament a Calais, es fòrça celèbra, mas se desconeis son identitat. Dempuèi qualques annadas l’artista a mostrat un interès constant pel conflicte en Palestina, amb de memorablas òbras que denóncian la situacion e critican las politicas de l’estat d’Israèl, dont la bastison de la barralha de separacion, que l’evòca l’ostalariá.