Lo govèrn espanhòl estúdia la possibilitat d’aplicar l’article 116 de la Constitucion espanhòla, que permet d’establir l’estat d’alèrta, d’excepcion e de sètge, per arrestar lo procès independentista en Catalonha e Aran, en cas que l’aplicacion de l’article 155 de la Constitucion, que cèrca de suspendre las atribucions del govèrn autonòm de la Generalitat, siá insufisent, çò publicava El Periódico divendres passat.
 
Segon aquel jornal, lo govèrn espanhòl auriá mandat un escrich a la Comission de Venècia per justificar la legalitat de la reforma qu’a facha del Tribunal Constitucional. Mas la Comission de Venècia, qu’es un organisme consultatiu del Conselh d’Euròpa compausat d’expèrts independents en drech constitucional, publica uèi un tèxt fòrça critic a l’esgard de la cort constitucionala espanhòla e mòstra son chepic per la coercicion qu’ela exercís contra d’elegits catalans.
 
 
Los estats d’alèrta, d’excepcion e de sètge
 
Segon la legalitat espanhòla, se pòt declarar los estats d’alarma, d’excepcion o de sètge “quand de circonstàncias extraordinàrias fan impossibla lo mantenement de la normalitat mejançant los poders ordinaris de las autoritats competentas”.
   
Lo pòrtavotz del govèrn espanhòl, Íñigo Méndez de Vigo, assegurèt as jornalistas qu’el sabiá pas qual èra lo contengut de l’escrich del govèrn espanhòl a Venècia. “Lo govèrn deu aver presentat sas allegacions, e esperarà ara de veire çò que ditz la Comission de Venècia”. Segon Méndez de Vigo, s’agís d’“un tèma juridic d’a fons malaisit”.
 
 
La Comission de Venècia met en question la legalitat espanhòla
 
Mas, lo quite divendres, la Comission de Venècia emetèt un comunicat fòrça critic a l’esgard del Tribunal Constitucional espanhòl, que se publica uèi diluns oficialament.
 
La Comission de Venècia reconeis que i a pas d'estandards europèus sul tèma mas avertís que l’actitud espanhòla es “una excepcion” perque atribuís a la cort  constitucionala de dreches que li pertòcan pas e que son normalament assumits per “d’autres poders de l’estat”. Dins aquel sens, sollicita de l’estat espanhòl que reconsidère las mesuras excepcionalas qu’a atribuidas al Tribunal Constitucional e que permeton, per exemple, de perseguir los elegits catalans. Atal, se recobrariá “la percepcion de la cort constitucionala coma un arbitre legal”, çò precisa la comission.
 
La comission se mòstra particularament inquieta per la possibla coercicion contra d’elegits catalans de la part del Tribunal Constitucional espanhòl.
 
 
Pressions del govèrn espanhòl
 
Lo govèrn espanhòl se faguèt quichant per rebaissar lo ton del jutjament e las criticas de la reforma del Tribunal Constitucional. L’agéncia ACN rapòrta que “las pressions espanhòlas capitèron pas d’escafar totalament lo ton critic” de la Comission de Venècia dins son rapòrt.
 
 
Responsa de Puigdemont
 
“Davant la menaça de l’estat d’excepcion, volèm bastir un país de gents excepcionalas”, çò respondèt dissabte lo president de la Generalitat de Catalonha, Carles Puigdemont çò rapòrta VilaWeb.
 
“L’estat espanhòl a de modernofobia perquè considèra que los cambiaments prigonds li pòrtan tòrt”, çò apondèt. Dins aquel sens, acusèt Espanha de “se bonquerizar” e de cambiar las leis per ensajar de blocar los cambiaments.
 
Puigdemont, que parlava dins l’encastre del congrès de la Joventut Nacionalista de Catalonha (JNC), diguèt que la responsa de la Comission de Venècia èra un avertiment a Espanha que “va pas plan”, e que “per aquel camin finirà coma una seguida de païses que son justament pas los qu’òm imagina quand òm pensa a de païses de tradicion democratica”.