Jornalet publicarà cada dimars, fins a la fin del Torneg de las Sièis Nacions de 2017, la cronica de Gèli Grande qu’auretz pogut escotar cada diluns sus Ràdio Lenga d’Òc.
 

Divendres 10 de març de ser l’esquipa del Principat de Galas recebiá los verds d’Irlanda.
 
Los punts fòrts comuns dels galeses e dels irlandeses son tradicionalament la mesclanha e la defensa. Lor devisa sembla èsser "placa que placaràs e grata que grataràs".
 
Las doas esquipas an de passapunts de tria, Halfpenny per Galas e Sexton o Jackson per Irlanda que compensan sovent l’impossibilitat de plantar d’ensages.
 
Totun, aqueste còp, los galeses portats per lors suportaires son anats tres còps en “terra santa” e los irlandeses ne foguèron empachats de gaire mai d’un còp.
 
Es atal, l’astrada d’un rescontre es sovent un afar de qualques centimètres de mai o de mens davant o darrièr la linha blanca.         
 
Aqueste rescontre interceltic èra lo tresen e darrièr de l’edicion 2017 del Torneg. D’un biais cap e tot anecdotic deviá designar lo segond e lo tresen, darrièr Escòcia que los venquèt totes dos.
 
Dissabte 11 de març, d’après-dinnada, Itàlia e los occitans de França avián un pichon rendètz-vos de ueitanta minutas a l’Estadi Olimpic de Roma, amb lo solelh en prèmi.
 
Coma sovent d’aquesta passa los italians comencèron a tota zuerta e puèi traquet traquet s’escantiguèron e fatalistas daissèron los occitans de França s’enairar cap a la victòria.
 
Èra un rescontre que quitament amb la melhora de las bonas volontats los italians podián pas gasanhar e que los occitans de França amb la pièger de las malas volontats podián pas perdre.
 
Los nòstres representants faguèron pas que respectar lor adversari e los i plantèron çò que caliá d’ensages per un bònus dels aisits.
 
Pels occitans de França, los punts positius son la bona tenguda de la mesclanha e la regularitat confirmada del nòstre passapunts.  
 
En tota fin d’après-dinnada d’aqueste onze de març a Twickenham, Anglatèrra tenenta del títol 2016 aculhissiá Escòcia sa vesina del nòrd (o de l’ubac).
 
L’infirmariá de l’esquipa cèlta èra ja clafida de monde de valor abans la tota debuta del rescontre. 
 
L’arribada al cap d’un vintenat de minutas de jòc de la pichona pèrla d’endarrièr qu’es lo Stuart Hogg, foguèt per Escòcia coma lo còp de gràcia. 
 
D’un cap a l’autre, lo rescontre foguèt una passejada de santat per Anglatèrra. Lo tres-quart-centre Jonathan Joseph faguèt un “hat trick” o còp del capèl, en tot plantar tres dels sèt ensages dels seus.
 
Del seu costat lo passapunts Owen Farrell enquilhèt tot, siá 26 dels 61 punts angleses.
 
Amb aquesta victòria bonificada Anglatèrra es assegurada del títol per 2017 abans la cinquena e darrièra jornada del Torneg.  
 
 
 
 
Gèli Grande