Alara que Superliga e NRL son al temps de las suspresas, las competicions occitanocatalanas s'installan per l'ora dins de resultas previsiblas.
 
Los Singlars engàbian los Canaris
 
A Domèc, una bèla audiéncia seguiguèt l'afrontament de tria entre lo FC Lesinhan e l'AS Carcassona. La partida foguèt equilibrada fins a l'ora de jòc ont los Verd e Blanc faguèron una “Barça”: tres ensages en sèt minutas per l'emportar 28-18 .
Dissabte, Limós èra anat s'impausar a Albi: 40-12. Las autras doas partidas del dimenge s'acabèron sus las victòrias dels vesitaires: los Dragonets a Sent Gaudenç: 40-12  e Vilanòva a Tolosa: 40-28.
 
 
Tolosa domda los Lions
 
Dissabte, a Blanhac, lo Tolosa Olimpic recebiá los Lions de Swinton. Los occitans mostrèron un bèl vam ofensiu, mas se compliquèron la vida amb qualques abséncias defensivas que permetèron als angleses, sostenguts per un brave grop de canturlejaires, de demorar dins la partida. Victòria del TO: 36-28 que reçauprà dissabte de vèspre, als Minims aqueste còp, Batley pel compte de la Cup.
 
 
 Lo Rinocèros esclafa los pès del Dragon
 
En Superliga, los Dragons catalans èran montats a Leeds lo còr plen d'esperança. Ne tornèron amb una mala refofanta de dobtes: desfaita gròssa (46-10) e dos nafrats, lo menaire de jòc Greg Bird (poce fracturat) e l'alièr Broughton , que seràn absents un brave moment. Aquí de qué balhar a l'entraïnaire Laurenç Fraissinós de qué perpensar per montar l'esquipa que reçauprà St Helens aqueste dissabte 18 de març a 6 oras del vèspre a Brutus.
 
La jornada se dobriguèt per la victòria aisida de Wigan, amb Escarré a l'arrièr (que passèt 5 transformacions) e l'entrada del pilar Navarette, a Warrington: 38-16, los Lops malautejan . Divendres, Leigh passèt 30 punts (30-0) als Gigants d'Huddersfield , Hull-FC dominèt St Helens 24-14. Dimenge, Castleford contunhèt d'avançar sus una nívol: victòria 34-0 a Widnes e Wakefield finiguèt que batèt Salford: 24-22 .
 
 
E totjorn lo tombat de Thurston
 
En NRL , èra jorn de dèrbi en Queensland entre Brisbane e los Vaquièrs dins un Suncorps plen coma un uòu. Las doas formacions anèron al punt en aur e la partida s'acabèt (se poiriá dire: coma de costuma!) sus un tombat de Thurston que balhèt la victòria als Vaquièrs: 21-20.
 
Los Poletons batèron los Dògols 28-24; la Tempèsta de Melbourne anèt ganhar a Auckland: 26-10. Los Lapinons dominèron los Tigres 36-2. La victòria 34-16 cò de St George permet a las Anguialas de Parramatta de prene lo cap del classament.
En cap d'aficha de la tresena jornada: Melbourne-Brisbane, dijòus; Titans-Anguialas divendres; Vaquièrs-Manly dissabte.
 
 
Aldo Quaglio, la legenda
 
Lo monde tretzista es pertocat per la mòrt a 85 ans d'Aldo Quaglio a Lavelanet . Designat coma melhor pilar mondial del XV en 1959 (33 seleccions, de la virada victoriosa en Africa del Sud en 1958; jogaire a Lavelanet e Masamet), passava a XIII ont joguèt a Roana e Carcassona. Portèt 17 còps lo malhòt dels Pols. Èra un pilar dels solides dins un temps ont se disputavan las mesclanhas. Cada tretzista saluda son engatjament esportiu e sa memòria que lo plaça per totjorn al panteon de nòstre espòrt.
 
 
Alan Roch