Lo partit pus important de la Republica d’Irlanda, lo Fianna Fáil, confirma que lèu se poirà veire una Irlanda unida. Per tant, ja trabalha sus una lista de 12 ponches per refortir las relacions amb l’Irlanda del Nòrd e que l’union siá pas traumatica quand lo moment serà arribat.
 
Aquela lista compren 12 ponches per refortir los ligams economics, politics e educatius entre la Republica d’Irlanda e l’Irlanda del Nòrd. Vòlon aital preparar l’illa per quora arribarà lo moment de la reunificacion. Son cap, Mícheál Ó Máirtín, crei que poirà veire una Irlanda unida pendent sa vida mas qu’encara cal fòrça trabalhar per i arribar.
 
Dins una entrevista autrejada al jornal Irish Times, Ó Máirtín soslinhèt quines serián los dotze ponches que mai cal trabalhar per la reünificacion irlandesa pendent los meses venents. Aqueles ponches comprenon de manténer l’Assemblada d’Stormont e benlèu tanben lo govèrn de l’Irlanda del Nòrd. Tanben un grand acòrdi amb lo Reialme Unit per far pagar a Londres lo deficit que lo poiriá aver l’Irlanda del Nòrd se i aguèsse una reünificacion.
 
Per Ó Máirtín, lo Brexit serà çò que menarà lo nòrd e lo sud de l’Illa ensems e rendrà possibla l’unitat de las doas Irlandas. La lista es facha per evitar una majoritat de consequéncias negativas en Irlanda del Nòrd.  Los ròtles de Londres e Dublin, cambiaràn dins lo futur, çò diguèt Ó Máirtín, mas seràn inversats. E cal, subretot, trabalhar per que siá possible un referendum dins l’illa per sa reunificacion.
 
 
Una lista de 12 proposicions
 
Lo Fianna Fáil doncas trabalha tre ara per desvolopar encara mai la frontièra entre los dos territòris e ensajar d’atraire d’investiments pus grands dins l’illa compresa coma una unitat. Per reüssir, es necite de daissar endarrièr las organizacions que se fan concurréncia, de crear de taxas armonizadas pels afars e d’establir de programas comuns en tot començar per l’istòria e la lenga anglesa.
 
Puèi conven de trabalhar sus las nòrmas dins l’encastre de l’alimentacion per las rendre comunas en tot adoptar tanben una meteissa educacion. D’autras accions serián d’establir lo meteis accés a las institucions europèas après lo Brexit. Tanben cal, segon lo politician irlandés, crear de zònas de desvolopament comunas dins las regions que tòcan la frontièra après la retirada britanica de l’Union Europèa. Per o far, demandaràn una ajuda de 12,5 milions de liuras al Reialme Unit per poder formar una comission que desvoloparà totes aqueles ponches abans 2020.
 
Segon Ó Máirtín, aquela lista de trabalh serà una guida de principis de seguir per mostrar a totes los irlandeses cossí poiriá èsser una Irlanda unica. Amb ela, los irlandeses, çò diguèt, poiràn saber de qué parlan e avançar encara mai sus la reünificacion irlandesa. Serà un document de trabalh que serà utilizat per mostrar cossí seriá una Irlanda unica s’una majoritat de nòrd-irlandeses diguèsse de òc a la reünificacion. Que se fariá alavetz? Cal èsser ja preparats, çò soslinhèt lo politician irlandés. De mai, considerèt qu’una Irlanda unida es ja un fach que totes veirem pendent nòstras vidas e que per tant i cal trabalhar tre ara, en tot evitar las taxas frontalièras, coma a ja remarcat lo Sinn Féin, l’autre grand partit de las doas, pel moment, Irlandas.
 
 
 
 
Christian Andreu