Dissabte passat, tau parat de la Jornada Internacionala contra la fracturacion idraulica, se debanèren mantunas manifestacions pertot dens lo monde, e a Sent Cristòu d’Alèst (Garrigas) e Bèumont de Lomanha (Lomanha).
 

Segon l’AFP, 3500 manifestants s’amassèren a Sent Cristòu, e 400 a Bèumont. La revendicacion èra clara: vòlen que los permés ja acordats e siïn anulats, que las demandas futuras e siïn refusadas, e qu’una lei e siï promavuda per balhar emparas legislativas. La dangerositat de la tecnica de fracturacion idraulica, per l’environament atau coma per la santat umana, non diu pas estar desbrembada per rasons economicas, c’expliquèren.
 
Las manifestacions se debanèren dab un ambient hestiu, mès lo messatge demòra clar, ça que la. En Bèumont, maugrat la bona umor deus manifestants, l’ahar chepica hòrt la poblacion.
 
Que tot l’oest de Lengadòc e l’est de Gasconha son pertocats per aquestas demandas de permés de fracturar (en Caors, Bèumont de Lomanha e Briva, dab territòris pertocats hòrt espandits). Shens que digun e siï capable de provar la non dangerositat de la tecnica.
 
Pasmens, los militants ecologistas se tesican quant a la pausicion deu govèrn. Si ministres coma president s’afichèvan clarament opausats a l’exploracion e l’espleitacion deu gas d’esquist un an a, semblan uèi lo dia aver cambiat de vejaire. Tot au mensh, las pausicions son partatjadas e lo discors n’es pas portat collectivament. François Hollande anoncièt, divés 14 de seteme que set demandas de permés serén refusadas, shens totun precisar quaus èran los dorsèirs pertocats. Pr’amor d’aquera imprecision, los opausants au gas d’esquist cranhen que los refús de permés e tingui l’efècte d’anoncia governamentau, au moment d’aviar la soa conferéncia sus l’environament.
 
 
 
 
Pèir-Joan Masdiset