Lo Parlament Europèu a sancionat l’èurodeputat ultradrechista polonés Janusz Korwin-Mikke en lo privant de sos emoluments jornalièrs pendent trenta jorns (çò es 9210 èuros), en mai d’aquò, son activitat parlamentària es suspenduda durant dètz jorns e poirà pas representar l’Europarlament a l’exterior durant un an, per exemple dins una delegacion o conferéncia interparlamentària.
 
Lo president de l’Eurocambra, Antonio Tajani, anoncièt dimècres passat la sancion en assegurant que tolerariá pas “aquela sòrta de comportament”. Segon Tajani, “la severitat de la punicion es proporcionala a la gravetat de l’ofensa. Totas las femnas son estadas embrutidas per aquela ataca sexista durant lo debat en plenièra, a mai presidit per una femna e portant sul subjècte de l’egalitat entre los sèxes”.
 
Es pas lo primièr còp que l’ultradrechista polonés Korwin-Mikke es sancionat pel Parlament Europèu. La cambra lo privèt un còp a dètz jorns d’activitat parlamentària e li impausèt una multa de 3000 èuros per aver fach la saludacion faissista dins la sesilha plenièra.