Duas setmanas avant lo vòte de ratificacion deu parlament, lo Conselh Federau d’Euròpa Ecologia – Los Verds (EELV) se prononcièt dissabte contra lo Tractat sus l’Estabilitat, la Coordenacion e la Governança (TECG).
Uèi lo dia, tretze estats deus vint e cinc signataris an ja ratificat lo TECG, nau d’aqueths dens la zòna eurò. Bastaré que dotze deus detz e set estats de la zòna ic ratifiquin per qu’entri en vigor lo 1r de genèir de 2013.
Un pas mei cap a la rigor budgetària
Iniciat per Alemanha e per la Banca Centrala Europenca, lo TECG vòu completar las règlas budgetàrias ja apitadas dempuish 1997, e rectificadas en 2005 e 2011. L’amira n’es de limitar los deficits publics a 3% deu Producte Interior Brut (PIB), lo deficit estructurau (correspondent au deficit public shens los efèctes deu cicle economic) a 0,5% e lo dèute public a 60% deu PIB. Un ensemble de sanccions es estat previst, jos la fòrma de multas peus estats que respectarén pas las condicions deu Tractat.
Parallelament au TECG, lo president François Hollande se prononcièt per un “pacte per la creishença”, compausat de hons destinats a las regions mei praubas, d’una augmentacion deu budgèt de la Banca Europenca d’Investissament (per favorizar los prests), e d’obligacions ditas project bonds, entà financiar la creacion d’infraestructuras.
Opausicions de tots bòrds
Lo projècte de ratificacion, regitat per EELV au parat de son Conselh Federau, ne hè pas tanpauc l’unanimitat demiei lo Partit Socialista. Atau, un vintenat de deputats ròsas s’opausa ad aqueth navèth tractat. S’i opausan tanben lo Front d’Esquèrra (qu’apera a manifestar dimenge que ven) e l’integralitat de l’esquèrra anticapitalista.
Per eths, aqueth tèxte bastit per l’ancian governament e per Nicolas Sarkozy, criticat per François Hollande abans son eleccion, sembla una faussa solucion. Per Eva Joly es una hont de “desesperança”, e Denis Baupin (deputat EELV) parla d’“empach a la transicion ecologica”, pr’amor de la plaça de tria qu’es balhada a l’investissament per lutar contra la crisi. Es reprochat ad aqueth tèxte la soa presa de pausicion en favor de l’austeritat contre lo sosten a las poblacions, mès tanben un biais pauc democratic d’ic har passar, shens balhar dirèctament la paraula aus electors. Los ecologistas nòtan tanben que lo TECG e balharé mei de poder a la Comission Europenca au detriment deu Parlament.
Lo purmèir ministre francés Jean Marc Ayrault menacèt divés los opausants au TECG, en afirmar que “la consequéncia logica d’aqueth anar, es la sortida de l’eurò”. Seguit dens aquera dralha per mantuns responsables socialistas que shegotiren lo medish espaurugalh, dens un maniqueïsme que plaça los pro-tractats coma europèus responsables, fàcia aus opausants desrasonables.
Pèir-Joan Masdiset
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Perqué lo tractat budgetari europèu ne hè pas l’unanimitat ?
1) Per amor que sas consequéncias concrètas son l'interdiccion de menar una politica sociala respectuosament del dreit e de la dignitat de cada ciutadan europèu a contrabriu dels intersèsses financièrs internacionals.
2) Per amor qu'interdís las nacionalizacions d'entrepresas que, privadas estant, se trufan ben pro de l'interès ciutadan.
3) Per amor qu'obliga a privatizar una màger part dels servicis publics de vocacion mai egalitària entre ciutadans e entre territòris.
4) Per amor que l'interès mercant i passarà sempre davant l'interès public, Un pòble sens servicis publics quitant dèsser un pòble servit per venir un pòble de servicials, tant val dire d'esclaus.
M'estonas que faga pas l'unanimitat, un putanièr de tractat de tala mala raça !!! Quin esquerrista vertadièr ne voldriá ? Mas lo TECG a al mens un meriti, totun : nos mòstra clarament, se n'èra encara besonh, que lo partit socialista francés es plan majoritàriament pas un partit d'equèrra. Ja aquò's clar !!!
Èsser contra aqueste tractat val d'èsser contra Euròpa e eurò subre motius "sobeiranistas" d'estats-nacions se sentissent despossedits…
Mas èsser contra aqueste tractat pòt tanben valer d'èsser per una autra Euròpa, una Euròpa sociala e solidària que considère enfin que lo grand afar de las societats es sempre e deu demorar d'aparar la securitat fisica e sanitària (accès als servicis de santat, mas tanben a l'aiga potabla a de bon, e a de mangisca non empoisonada pels grands grops agroalimentaris), dignitat materiala mas atanben culturala e linguïstica, liure accès per totes e cadun a l'instruccion fins a la mai ponchuda, una instruccion generalista, e non pas exclusivament utilitarista e productivista, coma la que son a mand de nos botar exclusivament en plaça dins los programes pedagogics actuals, pertot en Euròpa neoliberala.
S'es besonh d'o remembrar, la rason d'èsser d'un èsser uman es pas ni de produsir, ni de consomar, mas d'èsser, e, per tant que possible, d'èsser uman…
Lo neoliberalisme e sos tractats de filhs de p… botan los individús en competicion los unes contra los autres, per alestir una societat de solesa e de paranoià generalizadas. Òm pòt èsser fòrça favorable a l'abolicion de las termièras d'estats, a la promocion de cada lenga e cultura pertot dins lo monde, e a l'alestiment d'una Euròpa e d'un mond unificats, dins l'estricte refús d'una logica liberala impausada per de tractats putassièrs que nos faràn encara mai esclaus del capitalisme internacional, nos sacant totes los unes contra los autres, dins una atomizacion individualista que cap consciéncia de pòble i aurà pas mai ges de plaça.
Nos vòlon pas daissar endeutar per mai de 3% de sabi pas qué ? Que nos daissen préner la moneda aquí ont se'n va amagar… Aquò restablirà leu fait los comptes. Serai ieu favorable a un pacte d'estabilitat qu'obligarà totas las borsas e sos parasits socials a servir los pòbles mai que de se servir d'eles.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari