Almens 42 personas mòrtas, dont fòrça femnas e enfants, es lo tragic bilanç de l’atac aerian en plena mar contra una nau tota plena de refugiats dins las aigas territorialas de Iemèn. I auriá mai d’un desenat de ferits. L’ÒNU a dobèrt una enquèsta per saber qual es darrièr aquel crime. Lo pòrtavotz del Naut Comissariat de las Nacions Unidas pels Refugiats (NACNUR), William Spindler, ditz que “lo NACNUR es esglasiat per la mòrt d’aqueles refugiats pendent l’atac contra lo vaissèl que los menava”.
 
L’atac en plena mar es estat un masèl. La majoritat de victimas èran de refugiats somalians e iemenitas que fugissián la guèrra e ensajavan d’arribar en Sodan. Lor estatut de refugiats èra documentat, portavan los papièrs que los identificavan coma de personas protegidas pel NACNUR.
 
Se privilègia l’ipotèsi que l’atac seriá òbra de l’armada de l’Arabia Saudita que fa la guèrra en Iemèn contra de rebèls huthis que sostenon l’èx-president del país. L’Arabia Saudita dirigís una coalicion amb lo sosten dels Estats Units, e afirman que, darrièr los huthis, i a Iran, lor enemic comun.