Es pressupòsti d'investiments en infrastructures der Estat espanhòu entar an 2012 non contemplen cap eth melhorament dera carretèra N-230 ath sòn pas pera Val d'Aran, maugrat qu'era ministra de Foment, Ana Pastor, se comprometec a completar-lo en responsa a diuèrses interpellacions de CiU e Entesa en Senat.

Maugrat es diferéncies logiques de partit, aguest tèma que desvelhe ua grana unitat entre es principaus formacions araneses. Entà Àlex Moga, baile de Vileha e Mijaran, reformar era carretèra N230 "ei reaument important per qüestions de seguretat". Deth sòn costat, Francés Boya, ex-sindic d'Aran e cap dera oposicion ahig que "era carretèra ei des ans 40 e es sòns murs son en tren d'esbaussar-se". Ath delà "era carretèra a un naut indèx d'accidentalitat e eth transit de camions ei de 500 per dia". 

Moga explique qu'actuauments "s'execute ua òbra d'urgéncia en aguest tram de carretèra de 3,4 milions d'èuros" çò qu'ei insufisent. Eth baile deth cap-lòc aranés ditz que ce que reauments vòlen "ei era definicion deth trajècte sense passar per Vielha e ua temporalitat d'òbres que sigue realista". Ath delà, Moga planh qu'enes darrèri sèt ans s'age investit fòrça en Pirenèu aragonés e s'age "deishat era Val d'Aran de costat" maugrat qu'er executiu precedent "informèc diuèrsi viatges dera immediata reforma". Boya ajuste qu'er executiu precedent "executèc eth tunèl nau e hec era melhora deth vielh entàs merces perilhoses". En çò que tanh ad aguest tram de carretèra "i a un projècte redigit en fasa d'estudis ambientaus que s'a d'executar".


Ferriòl Macip