Jornalet publicarà cada dimars, fins a l'11 d'abril, la cronica de Gèli Grande sul Torneg de las Sièis Nacions de 2017, qu’auretz pogut escotar cada diluns sus Ràdio Lenga d’Òc.

Aqueste dissabte 18 de març de 2017 se debanavan los tres rescontres de la cinquena e darrièra jornada del Torneg de las Sièis Nacions de 2017. 
 
A Murray Field, Escòcia recebiá Itàlia.
 
La setmana passada, parlant del rescontre entre Itàlia e los occitans de França, disiái un pauc resignat qu’èra un rescontre que quitament amb la melhora de las bonas volontats los italians podián pas gasanhar. Aqueste sentiment se repetiguèt contra Escòcia.
 
Quin que sia lo lòc del rescontre amb la piegèr de las marridas volontats la nacion cèlta podiá pas perdre tanpauc.
 
La sola bona novèla en çò dels italians, es la mesclanha que pòt aisidament rivalizar amb las autras cinc de la competicion. Per contra, çò que lor manca dramaticament es lo seriós dins l’alinhament e subretot un passapunts per enquilhar e quitar de vendemiar de penalitats e de transformacions d’ensages, que serián bonas pel moral de las tropas. E malaürosament, dempuèi la retirada internacionala del Diego Dominguez en 2003, es lo grand desèrt.       
 
Ongan Escòcia es contenta, que se gasanhèt totes los rescontres a l’ostal. Amb de jogaires coma Greig Laidlaw, Finn Russell e Stuart Hogg sabon ja que pel torneg venent o d’autras competicions auràn de qué embestiar las esquipas advèrsas.
 
A l’Estadi de França de Saint-Denis al ras de París, los occitans de França e Galas avián rendètz-vos. Aqueste rescontre previst per ueitanta minutas ne durèt cent.
 
Per la clartat del rugbi, seriá plan de decidir qu’un rescontre s’arrèsta al cap d’una ora vint minutas mai doas o tres marcadas electronicament sus un panel luminós sus un dels costats del prat jogatièr coma se fa pel fotbòl.     
 
Los occitans de França, qu’èran pas favorits, joguèron vint primièras minutas de las estrambordantas concretizadas per un ensag transformat e una penalitat. Bastèt d’una fauta del Vakatawa que li valguèt una sortida temporària per que la polida mecanica se desreglèsse.
 
Entre la 20a minuta e la 75a, lo jòc dels galeses foguèt pas extraordinari. Se contentèron de profitar de las nòstras fautas e sièis còps de tira Halfpenny enquilhèt tranquillòt. Sens las vint minutas suplementàrias suspresa de la tota fin, per resumir aqueste rescontre possiu que possiu seriá estat legitim d’escriure: Leigh Halfpenny 18 - occitans de França 13 … e seriá pas estat escandalós.
 
Francament apuèi aquesta victòria los occitans de França an pas de qué far los vantariòls.
 
Quinas que siagan las esquipas, un dels problèmas recurents del rugbi es lo de la tenguda de la mesclanha. A man dreita o a man esquèrra quin es lo pilar responsable de l’amarrocada?
 
Al cap d’un moment a cinc mètres de la linha blanca, amb o sens supòrt vidèo, i a o i a pas ensag de penalizacion.
 
En tota fin de tantossada, Irlanda e Anglatèrra s’acaravan a l’estadi Aviva de Dublin.  
 
Per plan comprene l’esperit del Torneg, cal èsser conscient que pels irlandeses lo rescontre de l’annada es lo contra Anglatèrra, la poténcia coloniala d’un còp èra.
 
Se lo rescontre se passa a l’ostal, lo nhac e lo vam son desmultiplicats.
 
Abans de dintrar sul prat jogatier los angleses sabián que victoriós o vencuts la primièra plaça lor èra assegurada. Aguèsson poscut, aurián pas dit de non per far un grand slam de mai. Quand vegèron tant en ataca coma en defensa, l’energia desplegada pels Verds comprenguèron lèu que caliá pas insistir e mai esperar pacientament la tota fin del rescontre sens tròp prene de punts dins la biaça.
 
 
 
 
Gèli Grande