La primièra ministra Theresa May notificarà a l’Union Europèa lo 29 de març que ven la retirada formala del Reialme Unit de la comunautat europèa. Aquel meteis jorn, lo govèrn britanic aviarà l’article 50 del Tractat de Lisbona, çò que serà lo senhal de la partença per començar de negociar formalament lo Brexit.
 
Lo representant permanent del Reialme Unit davant l’Union Europèa, Tim Barrow, informèt diluns passat lo burèu del president del Conselh Europèu, Donald Tusk, de son intencion d’invocar l’article 50 del tractat comunautari lo 29 de març que ven. “Aquela anóncia complís l’engatjament del Reialme Unit d’activar l’article 50 a la fin de març de 2017”, çò apondèt lo govèrn britanic.
 
Lo ministre cargat del Brexit, David Davis, remembra que lo pòble britanic adoptèt en junh del 2016 la “decision istorica” d’abandonar l’Union Europèa en soslinhant que lo Govèrn es ara “al lindal de la negociacion pus importanta per aquel país en una generacion”.
 
“Lo Govèrn es segur de sos objectius: un acòrdi que foncione per cada país e region del Reialme Unit e que, de fach, foncione per Euròpa tota; una nòva aliança positiva entre lo Reialme Unit e nòstres amics e aliats de l’Union Europèa”, çò expliquèt Davis.