Dens las Lanas, l’associacion “Gascon Lanas” —gropament qui amassa associacions qui defenen e hèn víver la lenga d’òc dens lo departament— que prepara un navèth estagi. Que’s debanarà en País de Bòrn lo dissabte 8 d’abriu (9h-18h) au centre de lésers Lac e Ocean de Carquevin, a Mamisan (Bòrn). Tres nivèus son prevists: iniciacion, nivèu mejan, apregondiment.
 
Aqueth estagi dens la petita ciutat  de la còsta atlantica, partatjada entre gròssa indústria (pasta de papèr) e torisme (mar, estanhs e passejadas dens los pinhadars lanusquets) que serà dens l’esperit deus estagis organizats a partir de 2010: deu de Biscarròssa en 2011 au d’Amor, en Shalòssa, en noveme 2016 qui estó un succès vertadèr dab 45 participants.  Aqueths encontres qu’an remplaçat las aplegadas de formacion a partir de 2002 a l’abadia d’Artós (Centre Departamentau deu Patrimòni, en País d’Òrte, a costat de la vielha bastida d’Hastings). Gascons de tostemps o d’adopcion, o simplament curiós d’ua cultura rica e interessanta, los qui vòlen descobrir o teisher navèths ligams dab l’estranh parlar de las nòstas contradas occitanas atlanticas que pòden venir de pertot: per descobrir la lenga, per parlar e —qu’es important e agradiu— per cantar (gasconlanas(a)gmail.com o 06 85 44 06 30).
 
 
 
 
Joan Jacme Fénié