Un nòu rapòrt de l’UNÈSCO, concretament apelat Recommendations for action: bridging the gender gap in Internet and broadband access and use, prepausa, coma o mòstra son nom anglés, de recomandacions per eliminar los obstacles que los afrontan las femnas tocant l’usatge e l’accès a Internet.
 
Lo document afirma que malgrat los esfòrces realizats dins tot lo Mond, la diferéncia mondiala d’utilizacion d’Internet entre los òmes e las femnas es passada de l’11% en 2013 al 12% pendent l’an 2016.
 
La diferéncia pus granda s’obsèrva dins los païses mens desvolopats amb lo 31% e en Africa amb 23%. De mai, los tausses de penetracion d’Internet contunhan d’èsser pus nauts pels òmes que per las femnas dins totas las regions del Mond.
 
La directritz generala de l’UNÈSCO, Irina Bokova, a considerat que lo constant desvolopament de las nòvas tecnologias e lor aplicacion als procèsses economics, politics e socials crèan d’oportunitats novèlas que pòdon melhorar la qualitat de vida de las personas.
 
Dins aquel sens, a soslinhat que per èsser sostenablas, las oportunitats novèlas devon èsser disponiblas e beneficiar a totòm, mai que mai als enfants e a las femnas.
 
Per resòlver la diferéncia numerica de genre, lo rapòrt suggerís, entre d’autras mesuras, d’amassar, analisar e seguir de donadas ventiladas per sèxe per documentar de politicas, mai que mai a las escalas estatala e subestatala.
 
Tanben recomanda d’integrar d’objectius d’egalitat de genre dins d’estrategias, de politicas, de plans e budgets, en fasent participar al procès tre lo primièr moment las femnas e las comunautats localas competentas.
 
 
 
 

---

Aquesta nòva es adaptada de Geopolítica.cat, amb qui Jornalet ten un acòrdi de cooperacion.