L’autoproclamat Estat Islamic a revendicat l’atemptat que lo patiguèt Londres dimècres passat, près del parlament britanic. Atal o comuniquèt ièr per mejan de son agéncia d’informacions, Amaq. L’ataca terrorista foguèt òbra d’una sola persona que se roncèt amb una veitura sul mond que se passejavan sul pont de Westminster, e puèi escotelèt un policièr. Lo bilanç es de quatre mòrts, dont dos passejaires, un policièr e l’assalhidor que foguèt abatut.
 
L’autor de l’atemptat, Khalid Masood, èra un òme de 52 ans nascut al Reialme Unit qu’èra ja conegut per la polícia e èra estat mes en examen per l’MI5 per extremisme violent coma “figura periferica”, mas a l’ora d’ara èra pas sul radar dels servicis antiterroristas.
 
 
Sèt detenguts a Londres e a Birmingham
 
Scotland Yard arrestèt ièr sèt personas per de ligams presumits amb l’agressor. Un centenat de policièrs participèron a l’operacion.
 
 
Un òme arrestat a Anvèrs qu’ensajava de se ronçar sus la molonada
 
Mentretant, la polícia bèlga arrestèt ièr un òme qu’aviá ensajat de se ronçar sus la molonada amb un veïcul immatriculat dins l’estat francés.
 
“Lo veïcul rotlava a granda velocitat sul Meir (la carrièra principala) dont las gents devián sautar sul costat”, çò declarèt lo cap de còrs de la polícia de la vila flamenca,  Serge Muyters, dins una conferéncia de premsa. Lo menaire foguèt arrestat après una corsa-perseguida dins lo centre vila.