McDonald’s ven d’anonciar son novèl hamburger nomenat “McOccitan” que serà disponible dins sos restaurants a partir del mes de mai. S’agís d’un entrepan de carn organica acompanhat de formatge de Ròcafòrt, de lachuga Lollo Bionda e d’un pan de granas de virasolelh.
 
Amb aquela nòva opcion, lo gigant estatsunidenc del fast food assaja, d’un latz, de mostrar un raprochament amb la mangiscla pus sanitosa, del temps que cèrca tanben una reconciliacion amb lo país de Larzac, ont se produtz lo formatge de Ròcafòrt e ont, en 1999, la societat estatsunidenca foguèt l’objècte d’una accion de fòrta protèsta, çò es lo desmontatge del McDonald’s de Milhau.
 
“E mai s’Occitània es una region de creacion recenta, es tanben un país istoric amb una istòria e una cultura conegudas dins tot lo Mond, especialament sa gastronomia”, çò declarèt Robert Biggs, cap de comunicacion de la societat. “Puèi qu’emplegam de produches de nauta qualitat, e de formatge de Ròcafòrt, originari d’aquela region, avèm decidit de nomenar «occitan» aqueste nòu hamburguer, que cèrca d’èsser lo pus requist de nòstres restaurants”, çò apondèt.