Lo cambiament d’ora mena qualques esquipas a èsser en avança e d’autras en retard. E quand se sap l’importància del cronomètre per mesurar la durada de las partidas!
 
Superliga: novèla decepcion catalana
 
Pas de miracle a Castleford: al cap de 12 minutas, los Dragons menavan 14-0 e puèi, la maquina s’arrestèt e los Catalans perdèron (un còp de mai): 43-26.
 
Dijòus, Wakefield, que jogarà dissabte a Brutus, batèt Leigh: 28-24. Quatre partidas se debanavan divendres: Leeds ganha a Huddersfield: 28-12; Salford va passar un 46-10 a Widnes; los Lops de Warrington pèrdon encara: 31-6 a St Helens; Hull-FC capita de ganhar a Wigan: 22-20 ont Escarré manca la transformacion de l’egalitat.
 
En Championship, lo Tolosa Olimpic capita de s’impausar cò de l’un dels gròsses de la competicion: los Featherstone Rovers: 34-26. Novèl viatge en Anglatèrra aqueste dimenge 2 d’abril: partida de jogar a Rochdale.
 
 
NRL: Las Làmias manjan las Anguilas
 
En Austràlia, los campions (las Làmias de Cronulla) se mòstran sens pietat per Parramatta: 20-6. Los Poletons ganhan lo dèrbi de Sudney contra los Lapinons: 20-6 e prenon lo cap del classament en companhiá de la Tempèsta de Melbourne(venceira cò dels Tigres de l’Oèst: 22-14). De notar, las largas victòrias de Penrith sus Newcastle: 40-0 e de Manly suls Dògols: 36-0.
 
 
Elèit 1: partida al cotèl a Avinhon
 
Aqueste dissabte, en tèrra provençala, la partida foguèt plan disputada entre Avinhon e los Canaris de Carcassona. Los vesitaires menèron 10-0, mas Avinhon passèt davant a 7 minutas de la fin: 15-10. A la 77a minuta, l’arrièr Miloudi tustava al pè al ras de la pelena e lo centre Vincenç Albèrt èra lo primièr a puntar. Gressèque transformèt e Carcassona ganhèt: 16-15!
 
A Vilanòva, Palau resistiguèt una ora abans de s’inclinar 30-10. A Albi, los Bròncos tolosans obtenguèron lor quatren punt de bònus defensiu de la sason en perdent 32-20.
 
Dimenge, dins la partida cap d’aficha, los limosencs passèron a la molineta los Dragonets: 50-22, alara que Lesinhan s’envolava dins lo darrièr quart d’ora fàcia als Orses de Sent Gaudenç: 72-26.
 
Al programa de la primièra dimenjada d’abril: dissabte, Lesinhan-Dragonets se jogarà a Brutus en dobertura de la partida de Superliga; Carcassona reçauprà Vilanòva e Limós jogarà a Tolosa; dimenge, se jogaràn St Gaudenç-Avinhon e Palau-Albi.
 
 
L’emocion al rendètz-vos
 
Lo còp passat, vos anoncièrem la mòstra dels Archius Departamentals de Tarn sul XIII. Bravament de mond prenguèron part a l’estrena aqueste divendres 24. A costat dels panèus de las explicas claras que mesclan lo raconte seriós e d’istorietas agradivas, se pòdon descobrir las afichas vièlhas, los balons de cuèr a 4 panèus, los crampons d’un còp èra, los malhòts de la primièra Copa del Mond… Una cabussada dins l’istòria granda e pichona de nòstre espòrt popular que justifica per caduna e cadun un passatge per Albi d’aicí lo 17 de junh!
 
 
Preparar deman
 
Los sovenirs, aquò es plan, mas cal tanben pensar a deman. E lo Challenge Grégoire, organizat per la MJC-Carcassona XIII, que ramosèt 1200 mainatges aqueste dimenge al pè de Ciutat es un bon exemple de l’òbra de menar per la formacion dels joves tretzistas.
 
 
 
 
Alan Roch