Dins l’encastre de la Jornada Europèa de las Lengas, e de la Setmana de l’Esperanto a Tolosa, los esperantistas de la Ciutat Mondina prepausan una sopar-convèrsa en occitan sus la lenga internacionala, a l’Estanquet de la Portièra.

La discussion se debanarà en doas partidas. En la primièra s’agirà de respondre a las questions que qualques unes se pòdon pausar sus la lenga, la siá istòria, construccion, actualitat, etcetèra, amb la tòca d’eliminar qualques prejutjats existents.
 
La segonda partida de la discussion virarà a l’entorn de las convergéncias e de totes los ligams que se pòdon menar a tèrme entre los movements socials, lo movement occitanista e l’ecologia lingüistica que prepausa l’esperantisme.
 
L’eveniment se debanarà deman, 27 de setembre, a 19h, e se volètz sopar pendent la convèrsa, cal reservar per e-mail al Centre Cultural Esperantista de Tolosa o dirèctament a l’estanquet (42 Carrièra dels Blanquièrs, telefòn: +33 (0)5 67 00 65 31)
 
L’esperanto es una lenga planificada que permet la comunicacion entre las personas en egalitat de condicions. Pensada coma lenga auxiliara e nèutra, es un gatge per la diversitat lingüistica. Al delà, la siá relativa facilitat la fa accessibla a quina persona que siá, independentament de la classa sociala, riquesa o cultura.
 
L’accion de l’esperantisme se basa, normalament, en l’aplicacion dels dreches reconeguts dins la Declaracion Universala dels Dreches Umans, dins la Declaracion Universala de la Diversitat Culturala, dins la Declaracion Universala dels Dreches Lingüistics e sustot dins lo Manifèst de Praga, sorgit dins l’encastre del movement esperantista.
 
En novembre de 2013, se debanarà en la Val d’Aran lo 1r Congrès Occitan d’Esperanto, conjonchament amb lo 36n Congrès Catalan d’Esperanto.