Una marcha amb de milièrs de personas e organizada per la Fondacion de Lucha contra la Corrupcion russa a Moscòu finiguèt dimenge passat amb mai de 700 personas arrestadas. Tanben  foguèt la scèna de violéncias entre la polícia e las gents que i participavan pacificament per las carrièras de Moscòu, la capitala de Russia. Las manifestacions, que foguèron mai d’82 dins mai d'una vila del país, foguèron pas totas autorizadas.
 
A Moscòu, i aguèt mai de 30 000 personas que decidiguèron de participar a aquela marcha après que foguèt conegut un nòu vidèo de YouTube sus una enquista policièra facha a l’entorn de las proprietats non declaradas de Dmitri Medbédev, actual primièr ministre rus. Lo vidèo foguèt publicat sus Internet per la Fondacion de Lucha contra la Corrupcion. Mas lo cònsol de Moscòu autorizèt pas la marcha.
 
Lo vidèo, qu’es estat vist per mai de 12 milions de personas, explica que “Medvédev a creat un malhum d’estructuras beneficiàrias per recebre d’argent de las classas oligarquicas russas e aital poder comprar de palaises e d’ostals dins tot lo país”. Segon aquel document, Medvédev auriá quitament crompat de castèls medievals fòra Russia.  La conclusion del vidèo es que lo primièr ministre rus pòt agir aital pr’amor qu’aquò es un fach generalizat en tota Russia per part de la clasa politica del país. De mai, aquelas personas an la proteccion de las fòrças de seguretat russas.
 
Fasiá de temps que s’èra pas vist tant de policièrs al centre de Moscòu. Segon OVD-Info i aguèt mai de 700 personas arrestadas per l’accion policièra. Totas subiguèron un protocòl administratiu per aver enfrach l’enebicion de la marcha, puèi foguèron tornadas metre en libertat. Totun, los trabalhadors de la Fondacion per la Lucha Contra la Corrupcion patiguèron, al delà d’aquò, una denóncia dobèrta per radicalisme.
 
 “Los revenguts en Russia son inferiors al minim per poder viure en un an, mas Medvédev viu amb totes los luxes”, çò se podiá legir sus una bandeiròla que la portava Vitali, de 22 ans, que participava pel primièr còp a una marcha coma aquela. Per el, es pas possible de demorar a l’ostal fàcia a tant de corrupcion. Las paucas personas que portavan de bandeiròlas dins la marcha foguèron las primièras arrestadas.
 
 
Paur de poder parlar amb libertat
 
Aquela marcha es estada considerada coma una reüssida pr’amor que los russes normalament an paur de participar a de marchas coma aquela. D'en primièr i a las menaças d’arrestacion, puèi las consequéncias  al trabalh o dins los estudis e mai encara las multas per conducha inadequada pendent la tenguda de mitings o marchas non autorizadas.
 
 “Es pas normal que Russia siá un país ric en ressorsas amb tant de mond dins la miséria”, çò diguet encolerida Liudmila. Amb ela i anava una vielha femna de 75 ans qu’encoratjava las fòrças de seguretat a participar tanben a la marcha contra la corrupcion.  Mas la polícia de Moscòu recebèt puèi l’òrdre d'arrestacion generalizacion e mai de 700 personas foguèron detengudas.
 
 
 
 
Christian Andreu