Lo Parlament d’Escòcia aprovèt ièr dimars de tantòst la proposicion de la primièra ministra, Nicola Sturgeon, de negociar amb lo parlament britanic un segond referendum d’independéncia. La proposicion foguèt aprovada per 69 vòtes en favor e 59 contra. Fa qualques setmanas, Sturgeon aviá afirmat sa volontat de convocar un referendum a la fin de l’an que ven.
 
“Se lo Brexit es inevitable, òm nos pòt pas impausar lo cambiament, nos cal aver drech de decidir se volèm cambiar”, çò diguèt Sturgeon al parlament escocés en tot defendre que lo pòble escocés a drech de poder causir entre lo Brexit o venir un país independent capable de far son pròpri camin.
 
 
Lo Brexit a cambiat las causas
 
En 2014 Escòcia votèt de “non” a l’independéncia per una diferéncia minimala amb l’“òc”. Pasmens, lo Brexit a cambiat radicalament las causas. Los escoceses votèron majoritàriament de demorar dins l’Union Europèa, mas lo resultat general del Reialme Unit lor impausèt çò contrari. Davant aquela situacion foguèron nombroses los que demandèron a Euròpa de i demorar  e se comencèt de parlar de far un segond referendum d’independéncia.
 
 
Theresa May i es pas favorabla
 
La decision del parlament escocés arriba un jorn après que la primièra ministra britanica, Theresa May, rescontrèt Sturgeon per li remembrar qu’ela èra pas favorabla al segond referendum.
 
La primièra ministra escocesa deu ara seguir lo mandat del parlament escocés de negociar amb May la tenguda del segond referendum, e caldrà veire çò que se decidirà de far en Escòcia en que Londres rebute lo vòte.