Patric Lavaud per estar creator-director deu hestenau musicau “Nuits atypiques” de Lengon, ne n’ei pas mensh collector de longa man.
 
Que l’entervistèm au parat de las enterpresas que promav entà transméter la lenga e la cultura medoquinas. Per exemple filmes DVD, mustra estiglanta apitada a partir deu hons qui a dat aus archius departamentaus de la Gironda titolada La tradicion orau occitana en Gironda, ua òbra artistica gessida de residéncia lo 16 de heurèr de 2012, un libe bilingüe. Passar, transméter De Boca a Aurelha (lo libe, lo concèrt) qu’ei la soa hami apassionada.
 
Lo libe de 207 paginas gran format, Lo Medòc qu’ei ua coedicion deus Archius departamentaus de la Gironda e de Daquí. Que’s tròba au prètz de 20 èuros. Reproduccions de cartas postaus ancianas e tres disques que l’acompanhan.
 
L’espectacle deu medish títol De boca a aurelha qu’ei de la Manufacture Verbale miada per Jakes Aymonino.
 
Çò qui anima Patric Lavaud n’ei pas ua nostalgia passadista. Qu’ei la hami de har partatjar l’esperit especific d’aquesta lenga de tèrra au cap de Gasconha. Ua quasi isla que l’arriba esquèrra de Garona vaduda l’emboc de Gironda e qui s’esparlassa dinc a mar grana. Alavetz que putza dens los soviers deus ans ueitanta (de 1983 enlà) qui las cintas magneticas e la votz, la musica, los perpaus deus enquistats, de Valentina Bòsc e tanben Nadau Bordessoule o Ramon Lagardère per exemple, e desvelhan e requinquilhan.
 
L’òbra bilingua qu’ei magistraument presentada mercés aus mejans deus archius departamentaus e qu’ei un plaser que d’anar a l’encontre. Encontre de la lenga e de totas las activitats, deus mestièrs e deus saber-hars umans. Collector que comencè aus vint ans tà d’abòrd apréner la lenga. E que voló conéisher la cultura populara de la gent. Qu’ei atau que practiquè ua etnologia d’urgéncia.
 
Un país medoquin qui n’a pas arren a envejar a l’independéncia montanhòla mes qui a un anar tot a fèit pròpi.
 
L’entervista sancèra dens l’emission d’En Ondas deu 5 de març de 2012.
 
 
 
 
Domenja Lekuona
Ràdio País
 
 
_____
LAVAUD, Patric. Lo Medòc, de boca a aurelha. Publicat per los Archius departementaus de la Gironda, dab l’ajuda de las Edicions de l’Entre-duas-Mars e deu label Daquí. 208 paginas + tres CD. Prètz : 20 èuros.