La cort d’apèl de Montpelhièr comuniquèt ièr als esqüataires del cinèma Royal de Montpelhièr, qu’avián 48 oras per quitar los locals. La justícia aviá donat rason als ocupants en primièra instància, en afirmant que “lo drech al lotjament preval sul drech a la proprietat”. Mas los proprietaris engatgèron una procedura d’expulsion.
 
Barrat en genièr de 2015, los proprietaris d’aquel cinèma avián l’idèa de lo transformar en immòble d’apartaments, dins l’encastre d’un projècte immobilièr qu’intrava dins la renovacion de la carrièra de Bossairòlas, tot près de la Plaça de la Comèdia, en plen centre de Monpelhièr. Mas per o poder far, lor caliá fòrabandir los ocupants del sit, e per aquela rason faguèron apèl a la justícia lo 2 d’agost passat. La justícia alavetz donèt la rason als esqüataires. Mas ara seràn expulsats.
 
L’esqüat aviá tornat reviscolar lo pus vièlh ecran de Montpelhièr en tot venir un espaci alternatiu de cultura e de reflexion dobèrt a totes. I an projectat de filmes de contengut social e de documentaris... e quitament i avián fach un concèrt de cant polifonic occitan en amassant dos centenats de personas.