Actualitats
Ara fa cinc ans. De milierats de personas manifèstan per una lei per la lenga occitana
30 000 personas segon l'organizacion, 25 000 segon la polícia, an marchat pel centre de la ciutat mondina
L'apèl de l'IEO Nacional, d'Òc-Bi e de Calandreta a manifestar per una lei lingüistica, a recebut dissabte 31 de març la responsa positiva de milierats de personas qu'an pres lo còr de Tolosa en una granda manifestacion reivindicativa. Fasiá tres ans de la darrièra granda marcha, a Carcassona en 2009, e la bona participacion faguèt evident que la clamor sociala en Occitània existís, qu'es pas una mòda. Los 80 carris venguts de tot lo país son un bon element objectiu per qualificar la participacion a la marcha Anem Òc!
Abans de la manifestacion, los organizadors convoquèron una conferéncia de premsa ont expausèron lo besonh de dotar d'una lei las lengas dichas regionalas o "autoctònas" al dire de Joan Francés Laffont, president de Convergéncia Occitana. Qualques elegits a nivèl regional e local mostrèron lo lor sosten a la peticion davant lo public, ont i aviá lo president del Senat francés Jean-Pierre Bel.
Pendent tot lo matin, lo centre de la reivindicacion foguèt la Plaça d’Euròpa, ont las entitats e las associacions occitanas quilhèron los taulièrs. Ailà, los manifestants poguèron manjar e beure un còp en tot escotar los discorses e la musica en dirècte; e de cançons interpretadas per qualques calandrons.
Puèi, la protèsta comencèt de bolegar pels baloards de Tolosa fins arribar a la Plaça del Capitòli, dins un ambient festiu e convivial, animat per de musicians e de fanfarras. Parier que los autres còps, los escolans de Calandreta foguèron nombroses dins la manifestacion.
Joan Francés Laffont a qualificat plan positivament la participacion, en tot indicar qu'ongan se son convocadas de manifestacions per las lengas dichas regionalas dins las principalas vilas de las regions amb lenga pròpria (Baiona, Perpinhan, Kemper, Aiacciu, Estrasborg, etc). E aquò a pas fach demesir la participacion a Tolosa, que s'es comptada en mai de 30 000 personas, 25 000 segon la polícia. A soslinhat tanben qu'es motiu de fiertat pel pòble occitan d'èsser estat a l'iniciativa d’aquel movement dempuèi 7 ans. Fin finala a declarat que França a pas ratificat l’article 30 de la Declaracion de Dreches de l’Enfant, a l'egal que Turquia, per exemple, e a volgut metre en evidéncia que se França èra pas dins l'Union Europèa i poiriá pas dintrar al jorn d'auèi sens ratificar aquel article.
A la fin de la manifestacion, dins la plaça del Capitòli i a agut la seguida de discorses dels organizators. An clavat la jornada los concèrts de Mans de Breish, Primaël, Joan Marc Leclercq, Lou Dàvi, Goulamàs'K, Lo Còr de la Plana, Zinga-zanga e Nadau.
L'album de fòtos de la manifestacion, per Cecília Hautefeuille
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Ara, tots els camins només van cap a la llibertat.
Més molt més, i sense defallir.
Visca la Terra...Lliure!
L'Ernest, "El Tàrrega".
#4 E cal pas doblidar lo boicòt dels mèdias francimands. O se n'an parlat, coma "Le Monde", o an fach de marrida fe en parlant de 17 000 manifestants, mens que la polìcia! I deguèron i anar a cinc oras del matin al passacarrièra! Sens comptar que 4 pelats que fan los colhons a Parìs per qualque tèma de mòda -"porteur- coma dison- te n'emplènan una pagina!
Visca Lo Jornalet que nos daisa dire lo que duim dedins lo cor e que se no existís, podriem pas dire.
#2 E non !
Se fa jamai quicòm per a de ren.
O expliquèri un còp lèu fach, mas es coma se shiulavi al cuòl de la crabas…
Dins una manifestacion per la lenga i son doas tòcas :
1- Pel govern e las institucions, que s’en foton, mas cal manifestar.
2- Pels estatjants ont se fa la manifestacion, es benlèu aquèla estiganças que ten lo mai de valor, e que demanda lo mai de trabalh, abans, mentre la manifestacion e apèi la manifestacion.
Per la tranmicion de la lenga segur que tirèm devèrs la fin del d’aquòs. Pr’aquò cal ensajar.
Autres còps podiai parlar amb un fum de mond, al vilatge, en familha, als vesins. Ara me damòra sonque un oncle meu que tira devèrs los 87 ans es dire que durarà pas longtemps, e un fraire meu que ten 57, ni per que parlèssa pas, me compren.
D’un autre latz sabem qu’es pas l’escòla, nimai las calandretas que socializan la lenga, pr’aquò devèm aver calendretas e cors d’occitan a l’escòla e cal contunhar e aumentar.
L’occitanisme a pas sabut trobar lo cliquet que faria prener consciença al mond de la valor de la lenga lor e que lor tornessa l’enveja de parlar.
Son estadas fachas un fum de causas que cal contunhar e nos cal virar devèrs çò qu’es pas estat enquera fach, e amb tot aquò es enquera pas segur que l’afar capitessa.
#2 Regausissètz-vos brave mond, que tot a cambiat dempuèi cinc ans, perque ara avèm la Lady Delgà, Las Joinèssas Mondinas, la Najat Belkacem e l'OPLO que nos van lèu-lèu sauvar l'occitan !
E òc, per la lenga nòstra es cada jorn lo primièr d'abril.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari