En validar la tèsi de l’accident quimic, la cort d’apèl de Tolosa a condemnat diluns Serge Biechlin a tres ans de preson, dont dus dab sursís, e a una multa de 45 000 èuros per omicidi involontari.

Maugrat los ensais de Total de boishar las pistas, es finalament la tèsi de l’accident quimic qu’es estada retinguda. Escartèren las autas ipotèsis, “las causas manifestament infondadas” (amassèvan lo pericle, la caduda d’una meteorite, l’explosion d’una bomba de la dusau guèrra mondiala) coma “l’intervencion volontària” (pista de l’atemptat).
 
Demorèva donc la pista quimica, defenduda per l’acusacion. Un regropament de productes incompatibles dens un entrepòst, un apòrt de DCCNA (troclosèn de sodium) sus nitrat umide e una reaccion quimica son a l’origina de l’explosion. Pas nat dobte, adara, sus l’encadenament deus disfonccionaments, e sus la responsabilitat deu director. “En agir atau, i a fauta caracterizada e grèva. Lo director deishèt se crear las condicions que permeturen l’accident. Es penalament responsable”, c’indiquèt lo president de la cort.
 
Lo grop Total, atau com son president Thierry Desmarest, son hòra de causa. Los magistrats tinguren lo ligam entre Total e l’usina tolosenca per tròp eslunhat per que’u grop siï directament associat a l’accident. Gaudissen d’un non-lòc. Totun Grande Paroisse, la filiala de Total proprietària deu sit de Tolosa es condemnada a una multa de 225 000 èuros. La defensa anoncièt suu pic son intencion d’anar en cassacion. Pasmens un navèth jutjament poiré pas portar que sus la fòrma e non pas suu hons deu verdicte balhat diluns. 
 
Las associacions de sinistrats arculhuren lo prononciat dab un grand solaç. S’amuishèren satisfeits que las tèsis “rocambolescas” estossin sepelidas, e que la responsabilitat de la direccion sii sancionada. Los avocats de la defensa, ça que la, insistiren sus l’abséncia de pròvas que justificava pas las condamnacions penalas tant pesugas.




Pèir-Joan Masdiset