Aran e Comenge seràn fin finala connectats per transpòrt public. Lo Conselh General d’Aran e lo Conselh Departamental de la Nauta Garona metràn un servici d’autobús en marcha lo 18 d’abril que ven.
 
Dins aquel sens, las doas administracions an signat un acòrdi que compta sus la participacion de doas entrepresas d’autobuses de linha que son ALSA, del costat aranés, e EPTR del costat comengés. Atal, la linha que travèrsa Aran de Vaquèira fins a Les farà la correspondéncia amb la linha comengesa fins a Sant Gaudenç. Se manten los meteisses oraris de diluns a divendres e ara las doas administracions son a estudiar qual serà lo servici que s’ofrirà pendent las dimenjadas. Lo prètz del bilhet se manten, e  doncas, de traversar Aran còsta 1,10 èuros, e d’anar fins a Sant Gaudenç costarà 2,20 èuros.
 
Tant lo Conselh General d’Aran coma lo Conselh Departamental de la Nauta Garona an manifestat lor intencion qu’aquel servici aja tanben una correspondéncia amb la linha ferrioviària de Sant Gaudenç a Tolosa.
 
Amb la mesa en marcha d’aqueste servici, las doas adminsitracions respondon a las demandas dels ciutadans d’establir una linha regulara de transpòrt public que connècte Aran amb la rèsta d’Occitània, coma aviá existit al començament del sègle XX amb lo tramvai.