Malgrat los esfòrces contra la fam a l’escala internacionala, aperaquí 108 milions de personas patiguèron l’inseguretat alimentària sevèra dins lo Mond durant l’an 2016, amb un aument drastic per rapòrt als 80 milions de l’an 2015. Atal o afirma un nòu rapòrt mondial sus las crisis alimentàrias publicat a Brussèlas.
 
Lo document es elaborat amb de donadas ofèrtas per la FAO, lo PMA, l’UNICÈF, l'Union Europèa,  los Estats Units e diferentas institucions regionalas.
 
Lo rapòrt soslinha que la fòrta aumentacion rebat los problèmas que la populacion deu superar per produire e accedir a la noiridura a causa dels conflictes, los prèses recòrd dins los mercats locals e los eveniments meteorologics extrèms causats per El Niño.
 
Luca Russo, assessor principal de la FAO sus las estrategias de resiliéncia, a declarat qu'un dels messatges principals del document es que las crisis alimentàrias son de mai en mai prolongadas e complèxas.
 
“Ongan, los conflictes son estats lo factor determinant de 10 de las 13 piègers crisis umanitàrias mondialas, çò que met en relèu l’estrech ligam qu’existís entre patz e seguretat alimentària”, çò a dich l’expèrt.
 
Russo a apondut que, segon lo rapòrt, la demanda d’ajuda umanitària s’intensificarà ongan, pr’amor que lo Sodan del Sud, Somalia, Iemèn e lo nòrd-èst de Nigèria riscan de subir de faminas.
 
Los autres païses que requerisson una assisténcia de granda escala a causa de l'inseguretat alimentària generalizada son Iraq, Siria —en comptant los refugiats dins los païses vesins—, Malawi e Zimbabwe.
 
Los 108 milions de personas que, segon lo rapòrt, son en situacion d’inseguretat alimentària sevèra en 2016 representan las gents que patisson un nivèl de malnutricion aguda pus naut de çò qu’es abitual e una manca generalizada de noiridura adaptada, quitament amb d’ajuda exteriora.
 
 
 

---

Aquesta nòva es adaptada de Geopolítica.cat amb qui Jornalet ten un acòrdi de cooperacion.