Facebook aguèt diluns passat un jorn òrre. D’un costat, s’enfonzèt a la borsa estatsunidenca. D’un autre costat, se produsiguèt un escandal enòrme en Euròpa, perque se faguèron publics qualques messatges privats dels usatgièrs, dels ans 2007-2009.

Los messatges de corrièr, que deurián èsser pas publics, apareguèron sul mur del destinatari e, s’aquel los escafa pas, s’i pòt pas res far.
 
Per veire aqueles messatges, cal anar sus las linhas de temps dels usatgièrs, als vièlhs murs, e clicar quin messatge que siá qu’indique qu’“X amics an publicat sus la biografia de…” La sola manièra d’escafar los messatges del mur es de los editar.
 
La direccion de la comunicacion de Facebook en Euròpa confirmèt d’aver examinat l’error, mas n’expliquèt pas lo motiu possible. Per contra, lo sèti de Califòrnia de Facebook diguèt qu’èra pas una error de seguretat. Segon lo director de l’engenhariá de l’entrepresa, Andrew Bosworth, s’agís d’una confusion dels usatgièrs e crei que totes los messatges que son apareguts ansin foguèron estats marcats coma publics en qualque moment. “S’agís de nòtas sul mur, e pas de messatges personals... Lo mond oblidan cossí emplegàvem lo mur dins l’anciana version”, çò diguèt.
 
 


Mai informacions:

Vilaweb: Escàndol pel forat de seguretat que ha fet públics missatges privats de Facebook
Le Monde: D’anciens messages Facebook apparaissent publiquement sur les profils e Facebook dément que des messages privés aient été rendus publics
El País: Facebook deja al descubierto mensajes privados
BBC: Facebook private message rumour is 'false', site says 
The Next Web: How to remove all your old Facebook wall posts, public or private, from your Timeline