Diumenc passat, après una reünion de campanha, los militants Front Nacionau de Vinhana Nauta decideren de festejar los vint ans de l'entrepresa d'electricitat de lor secretari departamentau. Serada fòrça alcolizada que se 'chabet au Duc Etienne, bar dau centre istoric de Limòtges, per una bagarra dins la quala lo patron de l'establiment aguet lo nas romput.

Segon los tesmonhs, riberen en exhibar una bata de besbòl e en dire qu'eran aquí per esbolhar de l'estudiant de mança. Après l'intervencion de la polícia, lo barman e son patron decideren de barrar l'establiment. Los militants FN torneren e ataqueren los dos òmes davant de fugir.

Tres daus militants siràn interpelats per la polícia dins lor fugida. L'un aurá nonmàs un rapel a la lei per pòrt d'armas e ebrietat publica. Los dos autres siràn presentats davant lo tribunau correcionau de Limòtges lo 19 julhet venent. "Aviá tròp begut e zo rancure", declaret lo secretari departamentau dau FN. "Es verai, aviá un coteu dins ma pòcha, emb un tiraboschon, mas qui ne'n a pas?" çò disset. Sap pas si se podrá presentar per las legislativas dau mes de junh. E mai se sent victima d'una mena de linchatge. Marine Le Pen declaret ier que será demés de sa foncion si es condamnat, en tot se'n préner aus "poirits" que lo PS e l'UMP demeten pas e aus jornalistas que parlen pas daus militants FN nafrats dins la campanha.



Maime Caillon