Lo referendum d’independéncia de Catalonha e Aran se convocariá dins dos meses, segon çò que revelèt ièr a la ràdio RAC1 lo vicepresident de la Generalitat de Catalonha cargat de l’economia, Oriol Junqueras. Segon el, en aquel temps seriá acabat lo trabalh dels especialistas que son a pilotar lo vòte.
 
A prepaus de la question que se pausarà, Junqueras se reconeguèt favorable a la preséncia del tèrme “republica”, coma o prepausa la CUP, qu’a començat una campanha amb de bulletins de vòte en catalan, occitan, espanhòl, romanés e arabi.
 
 
Se farà, malgrat las menaças del Tribunal Constitucional
 
Lo Tribunal Constitucional espanhòl a suspendut aquesta setmana las partidas del budget de la Generalitat de Catalonha tocant l’organizacion del referendum. E mai, los jutges an menaçat “de mesuras penalas”.
 
Mas segon Junqueras, lo vòte se farà de tot biais. Dins aquel sens, lo vicepresident catalan planguèt que s’agiguèsse d’un tribunal plan politizat, e tornèt afortir que lo govèrn catalan tendriá son engatjament per que los ciutadans poguèsson decidir lor avenir politic. “Sèm absoludament decidits amb aquela volontat”, çò concluguèt.
 
A prepausa de la menaça de “mesuras penalas”, Junqueras diguèt que las personas que compausan lo govèrn catalan an pas paur. “Nos menaçan cada jorn, mas sèm encara aicí per ensajar de far çò que caldrà per complir lo mandat. Que faràn? Nos rendràn ineligibles? D’acòrdi, doncas que nos rendan ineligibles. Nos embarraràn en preson? Eles devon saber çò que vòlon far”, çò afirmèt.