Un nòu projècte de vesitas pedagogicas en occitan es en marcha. La cantaira e pedagòga occitana Muriel Batbie Castell prepausa un grop de Facebook ont totes los ensenhaires d’occitan —de la mairala a l'universitat— pòdon publicar, partejar e difusar d’informacions e de contactes que tòcan a l'organizacion de sortidas e viatges pedagogics en classa d'occitan. La  tòca del sit es d’ajudar los ensenhaires a poder trobar lèu d’idèas de sortidas, de vesitas o mai d'animacions que completaràn lor ensenhament d'un biais atractiu. En mai d’aquò, aquel grop cèrca d’encoratjar los ensenhaires a crear una demanda cap als sits, oficis de torisme, etc.. en lor demandar de prepausar de vesitas e tanben de visuals en lenga occitana.
 
En remarcant la manca d’aisinas pedagogicas en occitan e de catalògs de viatges escolars que sortisson cada an per las autras lengas e que prepausan de viatges “clau en man”, Batbie-Castell es a trabalhar amb una entrepresa estatala per far sortir un capítol dins lo catalòg Occitania: lenga e cultura a l'entorn d'un projècte de viatge itinerant de Lengadòc a las Valadas italianas, que lo CIRDÒC, la Chambra d'Òc e mai d'un centre occitan ne serián partenaris.
 
 
De Fois a Ortès en occitan sul camin de Gaston Fèbus
 
Una d’aquelas vesitas que la prepausa es un viatge tematic “sul camin de Gaston Fèbus” en tot menar los escolans de Fois a Ortès en passant pas las ancianas fortalesas de Montanèr e de Morlana. “Mancam sovent d’una vision globala de çò que podèm far” —çò a dich Batbie-Castell a nòstres confraires de La Setmana— “prepausi tot simplament als collègas de ganhar de temps”.
 
Mentretant, Muriel Batbie-Castell es a preparar un autre viatge tematic suls passes de Frederic Mistral.