Jornalet publicarà cada dimars, fins a l'11 d'abril, la cronica de Gèli Grande sul Torneg de las Sièis Nacions de 2017, qu’auretz pogut escotar cada diluns sus Ràdio Lenga d’Òc.

Abans de vos parlar del Torneg de las Sièis Nacions vaquí una pichona remembrança. L’esquipa còla gasanha totes los rescontres fa lo grand slam e la que se los pèrd totes aganta simbolicament lo culhièr de fusta.
 
En 2000, se debanèt lo primièr Torneg de las Sièis Nacions amb l’entrada d’Itàlia dins la competicion.
 
Torneg gasanhat per Anglatèrra. Se los italians acabèron a la darrièra plaça, batèron almens Escòcia a Roma.
 
En 2001, lo senhorejament anglés contunhèt mas, malgrat una bona qualitat de jòc, los italians eiretèron d’un primièr culhièr de fusta.
 
En 2002, los occitans de França donavan d’aire de se passejar e s’ofriguèron lor seten grand slam del temps que los italians s’i tornèron per un segond culhièr de fusta.
 
En 2003, lo grand slam foguèt pels angleses que confirmèron aquò per un primièr titol mondial plan meritat. Aqueste an, lo culhièr de fusta foguèt pels galeses.
 
En 2004, los occitans de França gasanhavan un ueiten grand slam e pel culhièr de fusta los escoceses remplacèron los galeses.
 
En 2005, aqueste còp lo grand slam foguèt galés e los italians obtenguèron un tresen culhièr de fusta.
 
En 2006 e 2007, se los occitans de França gasanhèron lo torneg, i aguèt pas de culhièr de fusta per degun.
 
En 2007, pel primièr còp del Torneg los italians acabavan a la quatrena plaça de la competicion.
 
Encara en 2007, los occitans de França qu’organizavan lo Mondial foguèron dificilament a la nautor de l’eveniment. Batuts pels Pumas d’Argentina dins la fasa qualificativa, puèi eliminats per Anglatèrra en mièja finala e tornar-mai batuts e quitament umiliats pels Pumas per la medalha de bronze.
 
En 2008, segond grand slam del decenni per Galas, seguit en 2009 per un grand slam irlandés e un quatren culhèr de fusta per Itàlia.
 
Los ans 2010 se dobriguèron per un noven grand slam dels occitans de França.
 
2011 vegèt la victòria finala d’Anglatèrra.
 
2012 foguèt una annada galesa amb un novèl grand slam e lo culhèr de fusta per Escòcia.
 
En 2013, lo País de Galas confirmèt e pel primièr còp dempuèi plan de temps los occitans de França foguèron darrièrs, precedits per Itàlia e Irlanda.
 
2014 e 2015 foguèron d’annadas irlandesas amb dos culhièrs de fusta successivament per Itàlia, puèi Escòcia.
 
En 2016, après lo Mondial de 2015 cap e tot mancat tot ben que se debanèsse a l’ostal, Anglatèrra se desrevelhèt e faguèt lo grand slam. A l’autre cap del classament, Itàlia contunhèt de colleccionar los culhièrs de fusta. Lo seisen per dètz e sèt participacions.   
 
En 2017, los angleses tornèron gasanhar sens far lo grand slam davant Irlanda, los occitans de França e mai Escòcia totes a egalitat de punts. Lo principat de Galas acabèt cinquen e Itàlia recebiá un seten culhièr de fusta per dètz e uèit participacions.
 
 
 
 
Gèli Grande